KM Ban Ki-moon amehuzunishwa na kifo cha Brigedia Jenerali Ahmed Moinuddin, Makamu Kamanda Mkuu wa Vikosi vya Ulinzi Amani vya UM katika Sudan Kusini (UNMIS), ambaye aliuawa Alkhamisi, mnamo tarehe 22 Oktoba, baada ya shambulio liliotukia Islamabad, Pakistan wakati akiwa mapumzikoni. KM alitumia salamu za pole ukoo wa wafiwa, wafanyakazi wa UNMIS na kwa Serikali ya Pakistan, na alitumai watu walioendeleza shambulio, watashikwa haraka na kufikishwa mahakamani.
Ripoti mpya iliotolewa na Shirika la UM juu ya Huduma za Wahamiaji (UNHCR) kuhusu maombi ya hifadhi ya kisiasa katika nchi zenye maendeleo ya viwanda, imebainisha ongezeko la asilimia 10 ya maombi hayo katika nusu ya mwanzo ya 2009, tukilinganisha na kipindi hicho hicho katika mwaka uliopita.
Mohamed El Baradei, Mkurugenzi Mkuu wa Shirika la UM juu ya Matumizi ya Amani ya Nishati ya Nyuklia (IAEA) leo Ijumatano aliwaambia waandishi habari wa kimataifa kwamba baada ya siku mbili na nusu ya majadiliano mjini Vienna, taasisi yao imepitisha maafikiano ya awali kuhusu taratibu za kutumiwa kuisaidia Iran kupata nishati itakayotumiwa na kiwanda chao cha kiraia cha kufanyia utafiti wa matibabu.
Hilde Johnson, Naibu Mkurugenzi Mkuu wa Shirika la UM juu ya Mfuko wa Maendeleo kwa Watoto (UNICEF), baada ya kuzuru Jamhuri ya Afrika ya Kati (JAK) ameeleza kwamba matatizo yaliolizonga taifa hilo huathiri pakubwa watoto wadogo, na hali hiihuenda ikaharibika zaidi pindi wahisani wa kimataifa watashindwa kuharakisha misaada inayohitajika kidharura kuhudumia kihali watoto hawa.
Jumuiya ya Kundi Linalotumia Huduma za Usafiri wa Ndege za Kugawa Misaada ya Kiutu, ambalo hujulikana kama Kundi la UNHAS, imetangaza leo kwamba italazimika kusitisha operesheni zake nchini Ethiopia - hasa kwenye lile Jimbo la raia Wasomali - kwa sababu ya upungufu wa fedha kutoka wahisani wa kimataifa.
Walter Kaelin, Mjumbe wa KM juu ya Masuala Yahusuyo Haki za Binadamu za Wahamiaji wa Ndani Waliong\'olewa Makazi, amekamilisha ziara ya wiki moja nchini Usomali kutathminia hali ya umma ulionaswa kwenye vurugu liliopamba katika taifa hili la Pembe ya Afrika.
Asubuhi, Baraza la Usalama lilikutana kusailia hali katika Afrika Magharibi. Haile Menkerios, KM Msaidizi juu ya Masuala ya Kisiasa alipohutubia Baraza la Usalama alizungumzia juu ya ziara yake ya karibuni katika Guinea na maeneo jirani, iliokusudiwa kuandaa utaratibu wa kulisaidia Bodi la Uchunguzi la UM kuendeleza ukaguzi wa vyanzo vya fujo ziliozuka nchini tarehe 28 Septemba mwaka huu. Alisema wadau husika wengi nchini Guinea pamoja na kutoka nchi wanachama wa Jumuiya ya Maendeleo ya Uchumi kwa Mataifa ya Afrika Magharibi (ECOWAS) wote, kwa pamoja, wanaunga mkono rai ya kuanzisha Bodi la Uchunguzi la kimataifa litakaloshughulikia tukio la Septemba. Baada ya mkutano wake na Baraza la Usalama, Menkerios alizungumza na waandishi habari waliopo Makao Makuu, ambao aliwaeleza kuhusu dhamira ya KM ya kuanzisha uchunguzi wa vurugu la Guinea haraka iwezekanavyo, pindi atapatiwa idhini ya kuyafanya hayo na Baraza la Usalama. Menkerios alisema Raisi wa Guinea, Dadis Camara amemuahidi kuwa atashirikiana kikamilifu na tume ya uchunguzi ya UM.
Shirika la Mfuko wa Kimataifa juu ya Huduma za Maendeleo na Kilimo (IFAD) limechapisha ripoti mpya ya utafiti ulioendelezwa na taasisi hii juu ya mchango wa malipo ya fedha wanazotuma makwao wafanyakazi wa Afrka waliopo nchi za nje.
Asubuhi KM Ban Ki-moon aliwaambia waandishi habari waliopo Makao Makuu kuwa anaikaribisha taarifa ya Raisi wa Afghanistan Hamid Karzai, ilitilia mkazo umuhimu wa kuhishimu na kufuata kanuni za katiba kuhusu uchaguzi, ambapo pindi wagombea uraisi watashindwa kupata asilimia inayohitajika, itabidi uchaguzi urudiwe tena ili kumpata mshindi halali.
Andrej Mahecic, msemaji wa Shirika la UM juu ya Huduma za Wahamiaji (UNHCR) leo asubuhi aliwaarifu waandishi habari Geneva kwamba makumi elfu ya raia wa Angola waliofukuzwa kutoka JKK, ambao sasa wamewekwa kwenye vituo kadha vya makazi ya muda kwenye mji wa Mbanza-Congo, Angola kaskazini, wapo kwenye hali mbaya na wanahitajia misaada ya dharura kunusuru maisha. UNHCR ilipeleka Mbanza-Congo, katika mwisho wa wiki iliopita, ujumbe maalumu wa kutathminia mahitaji ya wahamiaji wa Angola waliofukuzwa kutoka JKK.
