Habari Mpya

Katibu Mkuu wa Umoja wa Mataifa António Guterres amepongeza kazi kubwa na ngumu iliyofanywa na majaji na wafanyakazi wa Mahakama Maalum kwa ajili ya Lebanon, iliyoanzishwa kuwajibisha wahusika wa shambulio la Februari 14 mwaka 2005 huko Beirut. Mahakama hiyo imemaliza muda wake leo Jumapili Desemba 31, baada ya kufanya kazi kwa miaka 14.

Hii leo Desemba 31 mwaka 2023, ujumbe wa Umoja wa Mataifa wa kuweka utulivu nchini Mali, MINUSMA umekamilisha operesheni ya kuondoka nchini humo kwa mujibu wa azimio la Baraza la Usalama la Umoja wa Mataifa namba 2690 la mwaka huu wa 2023.

Kikao cha dharura cha Baraza la Usalama la Umoja wa Mataifa kimefanyika alasiri ya Jumamosi tarehe 31 baada ya kuitishwa na Urusi kufuatia mashambulizi huko Belgorod mpakani na Ukraine, mashambulizi ambayo Afisa Mwandamizi wa Umoja wa Mataifa amelaani.

Maafisa kadhaa wa ngazi za juu wa Umoja wa Mataifa, akiwemo Katibu Mkuu Antonio Guterres, Ijumaa kwa saa za Marekani wamelaani vikali shambulio kubwa la makombora lililotekelezwa usiku na ndege zisizo na rubani katika miji kadhaa ya Ukraine, ikiwa ni pamoja na kushambulia miundombinu ya kiraia.

Hii leo kwenye makao makuu ya Umoja wa Mataifa Baraza la Usalama la Umoja wa Mataifa limekutana kujadili hali ya Mashariki ya Kati hususan suala la Palestina wakati huu ambapo mapigano yanaendelea huko Ukanda wa Gaza, huku Katibu Mkuu wa Umoja wa Mataifa Antonio Guterres akielezea wasiwasi wake mkubwa juu ya mzozo huo kusambaa kwenye ukanda huo.

Nchini Niger mradi wa shirika la Umoja wa Mataifa la kazi duniani la kujengea uwezo jamii zinazotumikishwa umeweza kunusuru maisha ya jamii hizo ambazo awali zilionekana hazina thamani kwenye jamii, lakini sasa sio tu zina uwezo wa kiuchumi bali pia zinatambua haki zao na kujua kusoma na kufanya mahesabu. 

Huko Ukanda wa Gaza, Mashariki  ya Kati, takribani watu 100,000 waliofurushwa makwao hivi karibuni kutokana na mashambulizi yanayoendelea kutoka Israel wamemiminika Rafah, umesema Umoja wa Mataifa hii leo, na hivyo kufanya hali kuwa mbaya zaidi ya kibinadamu kwenye sehemu hiyo ya eneo hilo la kusini zaidi lililozingirwa na Israel.

Huko nchini Jamhuri ya Kidemokrasia ya Congo, DRC, wanajeshi wa kikosi cha kwanza kutoka Jumuiya ya Maendeleo ya nchi za kusini mwa Afrika, SADC kitakachokuwa na jukumu la kusaidiana na jeshi la serikali, FARDC kujibu mashambulizi kutoka kwa vikundi vilivyojihami mashariki mwa nchi hiyo, wamewasili huko Goma, mji mkuu wa jimbo la Kivu Kaskazini.

Shirika la Umoja wa Mataifa la Mpango wa Chakula Duniani (WFP) limelaani vikali uporaji wa chakula cha kuokoa maisha kutoka katika majengo yake kwenye Jimbo la Gezira nchini Sudan mwishoni mwa wiki iliyopita baada ya baadhi ya wanajeshi waasi wanaounda kikosi cha RSF kuvunja ghala na ofisi, baada ya kulitwaa eneo la Wad Medani. 

Mwaka huu umekuwa mwaka mbaya zaidi kuwahi kurekodiwa kwa watoto katika Ukingo wa Magharibi, ikiwa ni pamoja na Jerusalem Mashariki, huku ghasia zinazohusiana na migogoro zikifikia kiwango ambacho hakijawahi kushuhudiwa, amesema Mkurugenzi wa Shirika la Umoja wa Mataifa la Kuhudumia Watoto, UNICEF kanda ya Mashariki ya Kati na Afrika Kaskazini, Adele Khodr.