Habari Mpya

KM amewasishi wajumbe waliohudhuria Mkutano wa "Mwito wa Cotonou" uliofanyika Ijumatatu, tarehe 12 Oktoba kwenye mji wa Cotonou, Benin, kuzingatia hatari ya biashara ya magendo ya dawa za bandia, kuuhifadhi umma wao na "madhara ya siri na uharamu" wa biashara hiyo. Risala ya KM ilisomwa na Mkurugenzi Mkuu wa Baraza la UM juu ya Maendeleo ya Uchumi kwa Afrika (ECA), Abdoulie Janneh, na iliyahimiza Mataifa Wanachama "kuunganisha uwezo wao kipamoja kupiga vita jinai ya dunia ya kuuza dawa bandia kwa minajili ya masilahi ya afya ya jamii ya kimataifa." Mradi huu wa kampeni ya kuamsha hisia za kimataifa dhidi ya biashara haramu ya dawa za bandia ni uvumbuzi uliobuniwa na raisi mstaafu wa Ufaransa, Jacques Chirac.

Ijumamosi ya tarehe 10 Oktoba (2009) huadhimishwa na UM kuwa ni Siku ya Kuwakumbuka Wagonjwa wa Akili Duniani. Risala ya KM kuihishimu siku hii ilieleza siku hii huupatia umma wa kimataifa fursa ya kuhamasisha walimwengu kuchangisha fedha na misaada mengine muhimu inayohitajika kukamilisha malengo ya kutoa uangalizi bora na uuguzaji unaoridhisha wa maradhi ya akili kwa wagonjwa husika, hasa katika mataifa yanayoendelea ambapo mahitaji ya huduma hiyo ni makubwa na uwezo uliopo kukabili janga hilo ni haba sana.

Ripoti ya mwaka ya UNICEF kuhusu hifadhi ya watoto kimataifa imeeleza kwamba licha ya kuwa karibuni kulipatikana maendeleo kwenye suala hilo, watoto bado wanaendelea kudhalilishwa na kukabiliwa na vitendo karaha kadha wa kadha dhidi yao.

Leo asubuhi KM Ban Ki-moon amekaribisha kidhati tangazo la kuwa Raisi Barack Obama wa Marekani amezawadiwa Tunzo ya Amani ya Nobel kwa 2009.

Shirika la UM juu ya Huduma za Wahamiaji (UNHCR) limerudia tena onyo kwa wahamiaji Wakongomano waliopo Burundi, kutorejea makwao katika Kivu Kusini.

Msafara wa malori 13 yaliobeba chakula, yanayomilikiwa na Shirika la UM juu ya Miradi ya Chakula Duniani (WFP) yamewasili kwenye mji wa Dungu wiki hii, eneo la kaskazini-mashariki katika JKK, baada ya safari ya kilomita 1,000 ambayo ilianzia Uganda, na kupitia Sudan Kusini, hadi Kongo.

Shirika la Afya Duniani (WHO) limeripoti maambukizi makubwa zaidi ya homa ya mafua ya A/H1N1 yanasajiliwa kutukia sasa hivi kwenye kizio cha kaskazini chaa dunia, kwa sababu eneo hili linaingia kwenye majira ya homa ya mafua kwa sasa.

Kikao cha majadiliano ya mwisho mwisho, kilichofanyika Bangkok, Thailand kwa muda wa wiki mbili kimekamilisha mazungumzo yake leo Ijumaa, miezi miwili kabla ya Mkutano wa kihistoria juu ya Mabadiliko ya Hali ya Hewa utakaofanyika mwezi Disemba kwenye mji wa Copenhagen, Denmark.

Baraza la Usalama asubuhi lilijadilia suala la Usomali kwenye kikao cha hadhara. NKM juu ya Masauala ya Kisiasa, B. Lynn Pascoe na Craig Boyd, ofisa wa Kitengo cha UM Kusaidia vikosi vya Ulinzi Amani vya UA katika Usomali (AMISOM) waliwakilisha ripoti zao kuhusu maendeleo nchini humo.

Yvo de Boer, Mkurugenzi Mkuu wa Taasisi ya UM kuhusu Mkataba wa Kudhibiti Mabadiliko ya Hali ya Hewa (UNFCCC) ameripoti kupatikana maendeleo ya kutia moyo, kwenye mazungumzo ya matayarisho ya waraka wa kuzingatiwa kwenye Mkutano wa Copenhagen juu ya mabadiliko ya hali ya hewa.