KM ameripotiwa kuyapongeza yale maafikiano ya upatanishi yaliofikiwa karibuni kati ya Serekali ya Sudan na kundi la waasi wa Eneo la Mashariki. Mapatano haya yaliongozwa na Serekali ya Eritrea na kutiwa sahihi mjini Asmara tarehe 14 Oktoba.
Ripoti ya KM, iliyowasilishwa wiki hii kuhusu hali katika Sahara ya Magharibi imependekeza Baraza la Usalama kutoa mwito kwa Morocco na Chama cha Ukombozi wa Sahara ya Magharibi, Frente Polisario, wa kuwahimiza kushirki kwenye majadiliano yasio na shuruti, ya kutafuta suluhu ya kuridhisha na ya kudumu, itakayowawezesha wazalendo wa Sahara ya Magharibi hatimaye kutekelezewa haki ya kujiamulia wenyewe utawala halali.
Ripoti ya tano juu ya haki za kiutu ya Shirika la Ulinzi wa Amani katika Liberia (UNMIL) imeonya ya kuwa makosa ya jinai ya kijinsia, ya kutumia nguvu na mabavu dhidi ya wanawake na watoto wadogo bado yanaendelea kuendelezwa katika Liberia.
Ijumatano, tarehe 11 Oktoba iliadhimishwa kuwa ni ‘Siku ya Kimataifa Kupunguza Maafa’.
Mapema wiki hii, KM Kofi Annan aliwasilisha mbele ya Kamati ya Tatu ya Baraza Kuu, ambayo inahusika na masuala ya kijamii, kiutu na kitamaduni, ripoti maalumu inayozingatia tatizo sugu, na karaha, la utumiaji nguvu dhidi ya wanawake.
Ofisi ya Kamishna Mkuu wa UM juu ya Haki za Kiutu (OHCHR) wiki hii imetoa mwito maalumu uitakayo Serekali ya Sudan kufanyisha uchunguzi huru juu ya mashambulio ya kikabila yaliyotukia kwenye eneo la Darfur hivi karibuni, ambapo inasemekena mamia ya raia waliuawa, na inadaiwa Serekali “ikijua juu ya tukio hili na baadhi ya wenye madaraka wanatuhumiwa hata kufadhilia zana za kuongoza jinai hiyo” dhidi ya raia.~
Naibu KM juu ya Masuala ya Kisiasa, Ibrahim Gambari wiki hii anzuru Jamhuri ya Kidemokrasi ya Kongo (DRC) kwa madhumuni ya kuhakikisha uchaguzi utakaofanyika nchini mwisho wa mwezi kuchagua raisi na pia wawakilishi wa baraza la majimbo utakuwa wa amani.
Ijumatano KM Kofi Annan alishiriki kwenye kikao maalumu cha kuanzisha Mfuko wa Ujenzi wa Amani wa UM utakaotumiwa kuyasaidia yale mataifa yanayoibuka kutoka hali ya uhasama kurudisha amani kwenye maeneo yao na kujiepusha na hatari ya kuteleza tena kwenye mapigano, vurugu na machafuko.
Mapema wiki hii, kulifanyika sherehe kadha wa kadha katika miji mbalimbali ya dunia kuadhimisha ‘Siku ya Makazi Bora Duniani.’ Mada ya mwaka huu inasema: “Miji, ndiyo ni kivutio cha matarajio mema.”
Shirika la UM juu ya Huduma za Amani katika Sudan (UNMIS) limeripoti kuwa hali ya usalama katika Darfur ya kusini, inaendelea kuharibika, hususan katika mji wa Gereida, kutokana na mvutano uliojiri na uhasama kati ya makabila yanoishi kwenye eneo hilo. Wakati huo huo kwenye mji wa Um al-Kher, Darfur ya Magharibi imeripotiwa kutukia vifo vya watu walioambukizwa na maradhi ya kipindupindu. Ripoti ya karibuni ya KM imeonya ya kuwayale mashirika yanayohudumia misaada ya kiutu huenda yakafunga operesheni zake pindi hali ya usalama haijadhibitiwa katika eneo kama ipasavyo. ~~
