Mwakilishi Maalumu wa KM kwa Usomali, Francois Lonseny Fall wiki hii ameanza ziara ya nchi saba, zikijumuisha Djibouti, Ethiopia, Eritrea, Misri, Sudan pamoja na Uganda na Yemen kwa makusuddio ya kushauriana na viongozi wa mataifa hayo juu ya taratibu za kurudisha usalama na amani katika Usomali.
Wanajeshi wa Shirika la UM juu ya Ulinzi wa Amani katika Jamhuri ya Kidemokrasi ya Kongo, yaani Shirka la MONUC wameanzisha, wiki hii, doria yenye mada isemayo “Kinshasa, mji usio silaha”, kwa makusudio ya kuzuia vikundi vyenye kuchukua silaha kutoaranda randa ovyo na kuzusha fujo na vurugu, hususan katika kipindi ambacho taifa linajiandaa kufanya duru ya pili ya uchaguzi wa raisi mwisho wa Oktoba. Vikosi vya MONUC vinashirikiana kwenye doria hii maalumu na majeshi ya taifa ya Congo-DRC pamoja na vikosi vya polisi vya kutoka Umoja wa Ulaya.
Juan Mendez, Mshauri Maalumu wa KM wa Kuzuia Mauaji ya Halaiki majuzi amezuru Rwanda na alikutana kwa majadiliano na Raisi Paul Kagame.
Baraza la Usalama limepitisha maazimio ya kuongeza muda wa kazi za yale mashirika ya UM juu ya ulinzi wa amani katika Ethiopia na Eritrea (UNMEE), na katika JKK (MONUC) na pia katika Liberia (UNMIL).
Antonio Gutteres, Kamishna Mkuu wa Shirika la UM juu ya Wahamiaji la UNHCR, alipofungua rasmi, wiki hii, mijadala ya Kamati ya Utendaji mjini Geneva alishauri ya kwamba “wakati wa kuambizana ukweli” umewadia.
Ijumatatu tarehe 09 Oktoba (2006) Baraza la Usalama linatazamiwa kupiga kura ya kumteua rasmi KM mpya atakayechukua nafasi ya KM Kofi Annana mnamo mwanzo wa 2007. Baada ya hapo Baraza la Usalama litatuma jina la KM mpya mbele ya Baraza Kuu kuidhinishwa na wawakilishi wa kimataifa.
Shirika la UM juu ya Vipimo vya Hali ya Hewa (WMO) limeripoti ya kwamba tabaka la hewa kingifu la ozone katika eneo la ncha ya kusini ya dunia la Antartica, limethibitika kuharibiwa kwa kima kikubwa kabisa mno mwaka huu. Uharibifu huu husababisha miale ya jua kupenya kwa wingi zaidi kwenye mazingira ya kimataifa, na hukithirisha maradhi ya sartani kwa umma wa ulimwengu.
Shirika la Afya Duniani (WHO) limependekeza serekali zote za kimataifa kuongeza huduma zao katika kuboresha usafi wa hewa katika miji yao. WHO ilisema pindi hatua hii itachukuliwa na miji husika itasaidia kuhifadhi afya na maisha ya watu milioni 2 ambao hufariki kila mwaka duniani kutokana na uharibifu wa hewa.~~
Hivi karibuni wajumbe wa kimataifa walikusanyika kwenye Makao Makuu ya UM, mjini New York, kuhudhuria Mkutano Mkuu maalumu wa Baraza Kuu, uliofanya mapitio juu ya utekelezaji wa ule Mpango wa Utendaji wa Brussels wa 2001. Mkutano huo wa Daraja ya Juu ulisailia juhudi za kuimarisha maendeleo ya kiuchumi na kijamii katika yale mataifa 50 yenye uchumi wa kima cha chini kabisa, mataifa ambayo hujulikana kama LDCs.~~
Shirika la UM juu ya Miradi ya Chakula Duniani (WFP) limeripoti ya kuwa maelfu ya wahamiaji kutoka Usomali wanakimbilia Kenya hivi sasa kukwepa mapigano yaliofumka karibuni nchini mwao baina ya wafuasi wa Umoja wa Mahakama za Kiislamu (ICU) na vikosi vya Serekali ya Mpito.
