Lengo namba 13 la malengo ya maendeleo endelevu, SDGs linataka uhifadhi wa mazingira kwa kuchukua hatua muafaka. Katibu Mkuu wa Umoja wa Mataifa, Antonio Guterres akiwa ziarani katika nchi zilizoko ukanda wa pasifiki anapaza sauti ya kile kinachopaswa kufanywa kwa ubia ili kulinda sayari dunia kwa faida ya kizazi cha sasa na vizazi vijavyo.
Wakati dunia ikijiandaa kuadhimisha siku ya bahari duniani hapo kesho Juni nane shirika la Umoja wa Mataifa la Chakula na Kilimo FAO limesema ni vyema jamii kuzingatia afya ya baharí kwani umuhimu wake kamwe hauwezi kupuuzwa.
Umoja wa Mataifa umezindua mradi wa miaka mitatu wa kuimarisha mnepo wa jamii dhidi ya mabadiliko ya tabianchi mkoani Kigoma nchini Tanzania ambako mamia kwa maelfu ya wakimbizi wanahifadhiwa.
Jaridani hii leo tunaangazia ni mada kwa kina na nakupeleka mwambao wa Ziwa Tanganyika nchini Tanzania, hususan mkoani Rukwa ambako huko utasikia harakati za Umoja wa Mataifa za kujumuisha wanawake kwenye uvuvi. Pia tunakuletea habari kwa ufupi zikiwemo za Nishati jadidifu, mabadiliko ya tabianchi na afya. Katika mashinani tunakupeleka nchini Sudan Kusini kusikia ni kwa jinsi gani vijana wanachangia katika mchakato wa utengenezaji wa katiba ukielekea uchaguzi mkuu nchini humo.
Mkutano wa pili wa Baraza Kuu la shirika la Umoja wa Mataifa la makazi UNHABITAT umeanza leo mjini Nairobi Kenya ukibeba maudhui “Mustakabali endelevu wa miji kupitia ujumuishwaji na na ufanisi wa ushirikiano wa kimataifa: kufikia Malengo ya Maendeleo Endelevu wakati wa majanga ya kimataifa.”
Uchafuzi wa taka za plastiki unaweza kupunguzwa kwa asilimia 80 ifikapo mwaka 2040 ikiwa nchi na makampuni yatafanya mabadiliko ya kina ya sera na masoko kwa kutumia teknolojia zilizopo, kulingana na ripoti mpya iliyotolewa leo na shirika la Umoja wa Mataifa la mpango wa mazingira UNEP.
Ikiwa ni mwezi mmoja tangu kimbunga Freddy kupiga wilaya 15 zilizopo kusini mwa nchi ya Malawi na kuathiri maisha ya watu na makazi, jamii hizo bado zinahitaji usaidizi wa kibinadamu ili ziweze kuendelea na maisha wakati huu wakikabiliana na athari za kimbunga hicho ikiwemo mmomonyoko wa udongo.
Katika siku ya pili na ya mwisho ya ziara yake nchini Somalia Katibu Mkuu wa Umoja wa Mataifa amewapongeza watu wa Somalia akisema licha ya changamoto lukuki zinazowaandama wameendelea kuwa imara na kuonyesha mnepo wa hali ya juu, akiwataka kuendelea kufanya hivyo kwa ajili ya kizazi hiki na kijacho.
Cindy H. McCain leo Jumatano amejiunga rasmi na shirika la Umoja wa Mataifa la cpango wa chakula duniani WFP, kama mkurugenzi mtendaji wake mpya, akionya kwamba dunia inakabiliwa na janga la chakula ambalo halijawahi kushuhudiwa ambalo linalitaka shirika hilo lenye makao yake makuu mjini Roma Italia kukusanya rasilimali zaidi kwa haraka, kuwa bunifu zaidi na kuendeleza ushirikiano mpya wenye malengo makubwa kwa ajili ya mustakbali wa chakula duniani.
Mwishoni mwa wiki Umoja wa Mataifa na washirika wake wa misaada ya kibinadamu wametoa ombi la dola milioni 70 ili kuwasaidia watu zaidi ya milioni moja nchini Malawi walioathirika na kimbunga Freddy kilichoikumba nchi hiyo ya Kusini mwa Afrika mwezi uliopita.
Leo Baraza Kuu la Umoja wa Mataifa lilipitisha azimio la kuomba maoni ya ushauri kutoka kwa mahakama ya kimataifa ya haki ICJ kuhusu wajibu wa mataifa kwa ajili ya kukabiliana na mabadiliko ya tabianchi.
