Habari Mpya

Nchini Tanzania hii leo Idhaa ya Kiswahili ya Umoja wa Mataifa, UN NEWS KISWAHILI imeibuka  mshindi wa tuzo ya kimataifa ya kiswahili ya Shaaban Robert katika kategoria ya ukuzaji wa misamiati. Hii ni mara ya kwanza kwa kipengele hicho kutolewa na kwenye tuzo hizo ambapo tumemuuliza Onni Sigalla, Mhariri Mwandamizi wa Baraza la Kiswahili la Taifa, BAKITA, mmoja wa waaandaji wa tuzo hizo utaratibu wa ushindanishi.

 

Umoja wa Mataifa umeelezea wasiwasi wake mkubwa kuhusu kuendelea kuzorota kwa hali ya kibinadamu na kuongezeka kwa ghasia katika jimbo la Cabo Delgado nchini Msumbiji.

 

Athari za kiuchumi kutokana na janga la COVID-19 na kuongezeka kwa bei ya vyakula imepelekea takriban watu bilioni 2 Asia Pasifiki kutoweza kupata lishe bora imesema ripoti ya Umoja wa Mataifa, Jumatano. 

India imeanza kile kinachoelezwa kuwa ni kampeni kubwa zaidi duniani ya utoaji chanjo dhidi ya virusi vya corona au COVID-19, ikipeleka maelfu kwa maelfu ya wahudumu wa afya wenye ujuzi na kwa msaada wa shirika la afya la Umoja wa Mataifa WHO.

Ofisi ya haki za binadamu ya Umoja wa Mataifa, OHCHR, imeelezea wasiwasi wake kuhusu kuendelea kwa ukosefu wa usalama, umaskini, ukosefu wa usawa na kuongezeka kwa uhasama wa kisiasa ambao huenda ukachochea ghadhabu kutoka kwa umma ambayo itafuatiwa na kukandamizwa na polisi na ukiukaji wa haki za binadamu. 

Umoja wa Mataifa nchini Madagascar umetoa ombi la dharura la dola milioni 76 kwa ajili ya kusaidia takriban watu milioni moja ambao wanakabiliwa na janga la kibinadamu na wanahitaji chakula, lishe, maji na vifaa vya kujisafi na huduma ya afya. 

Katibu Mkuu wa kamati ya Umoja wa Mataifa la biashara na maendeleo UNCTAD, Dkt. Mukhisa Kituyi amemwelezea Katibu Mkuu wa Umoja wa Mataifa Antonio Guterres  kuhusu nia yake ya kujiuzulu kutoka nafasi hiyo kuanzia tarehe 15 mwezi ujao wa Februari.

Nchini Brazil, baada ya ugonjwa wa Corona au COVID-19 kusababisha vifo vya watu zaidi ya 200,000 na hali ya kutoweka kwa misitu ikishika kasi,  familia, ndugu na jamaa zimeibuka na mpango wa kupanda miti 200,000 kama njia ya kukumbuka wapendwa wao.

Watu zaidi ya 5,000 wamefungasha virago siku za karibuni wakikimbia mashambulizi ya waasi nchini Jamhuri ya Afrika ya Kati CAR hasa kwenye mji wa Magharibi wa Bouar na kuingia nchi jirani ya Cameroon kusaka usalama, limesema shirika la Umoja wa Mataifa la kuhudumia wakimbizi UNHCR.

Wakimbizi nchini Jordan wameanza kupokea chanjo ya COVID-19 ikiwa ni sehemu ya mpango wa kitaifa wa afya ambao unajumuisha raia wote, wakimbizi na wakazi.