Shirika la UM juu ya Mfuko wa Maendeleo kwa Watoto (UNICEF) wiki hii limetiliana sahihi na Serekali ya Zimbabwe, pamoja na mashirika 21 yasio ya kiserekali, maafikiano ya kufadhilia jumuiya za kiraia misaada ya kuhudumia uandikishaji ziada wa watoto masikini na mayatima 350,000, ili waweze kuhudhuria masomo ya skuli za msingi. Vile vile msaada huo unatazamiwa kuwahudumia afya na kuboresha lishe watoto husika.
Mapema wiki hii KM Ban Ki-moon alikutana na wajumbe wa Baraza la Usalama, kwenye kikao cha faragha, na walizingatia matokeo ya mazungumzo aliyokuwa nayo KM na viongozi wa Umoja wa Nchi Huru za Afrika (AU) walipokutana kwenye pambizo za Mkutano Mkuu uliofanyika karibuni katika mji wa Addis Ababa, Ethiopia.
Ijumatatu, Februari 05 (2007) Asha-Rose Migiro, aliyekuwa Waziri wa Mambo ya Nje na Maendeleo wa Tanzania aliapishwa rasmi kuwa Naibu KM mpya wa UM. Baada ya Bi Migiro kuapishwa na kutia sahihi waraka za UM alijulishwa na KM Ban Ki-moon na waandishi habari wa kimataifa waliopo Makao Makuu ya Umoja wa Mataifa. Naibu KM Migiro aliwaambia wanahabari hawo kwamba atajitahidi kama awezavyo kuziongoza kazi za UM kwa nidhamu iliyoungana, na kwa taratibu zinazoeleweka kwa masilahi na natija za taasisi hii pekee ya kimataifa.
Shirika la WFP limeripoti mafuriko haribifu yametanda karibuni kusini ya Afrika na kuathiri maisha na usalama wa makumi elfu ya watu waliojikuta wamenaswa na kuinuka kwa kina cha maji katika maeneo yao,hali ambayo imeangamiza mazao, nyumba na kuchukua maisha ya darzeni za watu.
Mnamo mwanzo wa wiki wawakilishi kutoka mataifa wanachama 58 walikutana kwa siki mbili katika mji wa Paris, Ufaransa kwenye mkutano uliopitisha itifaki ya kukomesha, kote ulimwenguni, tabia karaha na vitimbi haramu vya kuajiri kwa nguvu watoto wanaolazimishwa kushiriki katika vita na mapigano.
Wiki ijayo UNICEF, ikishirikiana na idara za ilimu na afya katika Ghana wanatarajiwa kujumuika kuanzisha huduma za siku nne zenye dhamira ya kuwapatia watoto milioni 4.5 waliopo katika skuli za serekali 28,000, matibabu dhidi ya maradhi ya minyoo.
Mwandishi habari wa Redio ya UM, Michele Montas hivi majuzi alizuru mtaa wa mabanda wa Mathare katika vitongoji vya Nairobi, mji mkuu wa Kenya.
Hivi karibuni, aliyekuwa mwandishi habari wa Idhaa ya Redio ya UM, Michele Montas alizuru Kenya kuangalia namna mashirika wenzi na UM yanavyoendeleza huduma za kupunguza umasikini, hasa miongoni mwa ule umma wenye kuishi kwenye mazingira ya hali duni.
Stephen Rapp, Mwendesha Mashitaka wa Mahakama Maalumu ya Sierra Leone juu ya Jinai ya Vita aliarifu wiki hii kuwa kesi ya aliyekuwa Raisi wa Liberia, Charles Taylor, inatazamiwa kuanza katika mji wa Hague, Uholanzi tarehe 04 Juni 2007. Taylor alifunguliwa mashitaka yenye kumtuhumu kuhusika na vitendo vilivyokiuka haki za kimsingi dhidi ya raia wa Sierra Leone wakati vita vya wenyewe kwa wenyewe viliposhtadi.
Mashirika sita ya UM, yakijumuika na Shirika lisio la kiserekali la kutoka Uholanzi lijulikanlo kama Baraza la Huduma za Wahamiaji la Kidachi,pamoja na jumuiya za kienyeji ziliopo katika mji wa bandari wa Bosaso, Usomali ya kaskazini wamejumuika kuhudumia mpango maalumu wa majaribio wenye lengo la kuzipatia aila 120 zilizong’olewa makwao baada ya mapigano kufumka, makazi mapya. Vile vile familia 30 nyengine masikini kutoka eneo la Bosaso nazo zitafadhiliwa makazi.
