Baraza la Usalama la Umoja wa Mataifa hii leo limejulishwa kuwa hali ya ukame na ukali wake nchini Somalia si ya kawaida huku mahitaji ya kibinadamu yakiendelea kuongezeka kila uchao.
Zaidi ya wasomali 600,000 wengi wao wakiwa wanawake na watoto wamekimbilia kusaka hifadhi nchini Ethiopia katika mkoa wa Somali katika wiki za hivi karibuni.
Wakati wa msimu wa krismasi mwaka jana, Rukia Yaroow Ali mwenye umri wa miaka 38, aliwasili kambi ya wakimbizi ya Hagadera iliyoko Daadab kaskazini mwa Kenya. Njaa na ukosefu wa usalama vilimlazimu akimbie kijiji chake cha Jilib nchini Somalia, akisafiri kwa punda na watoto wake 9.
Kutoka Geneva nchini Uswisi Kamisha Mkuu wa haki za binadamu wa Umoja wa Mataifa , Volker Turk ametoa wito kwa mamlaka ya Somalia kuhakikisha uchunguzi huru unafanyika bila upendeleo kufuatia mauaji yaliyotokea baada ya mapigano makali kuanzia tarehe 5 mwezi huu wa Februari nchini humo kati ya vikosi vya usalama na wanajamii wa ukoo wa Laas Canood.
Shirika la Umoja wa Mataifa la Afya Duniani, WHO inasema idadi ya milipuko ya magonjwa iliyoripotiwa na dharura za kiafya zinazohusiana na tabianchi katika Ukanda wa Pembe ya Afrika zimefikia kiwango cha juu zaidi kuwahi kutokea karne hii, na hivyo kuzidisha janga la kiafya katika eneo ambalo watu milioni 47 tayari wanakabiliwa na njaa kali.
Ingawa Umoja wa Mataifa ulitangaza kuwa baa la njaa limeweza kuepukwa kwa sasa nchini Somalia, Shirika la Umoja wa Mataifa la chakula na kilimo duniani, FAO limesema bado kuna muda wa kufanya mageuzi zaidi kuepusha kabisa baa la njaa kwa kushughulikia mahitaji ya haraka ya jamii za vijijini ambazo ni miongoni mwa walio hatarini zaidi.
Ukame wa zaidi ya miongo minne na mafuriko vimekuwa ‘mwiba’ kwa wananchi wa Somalia na hivyo kutishia uhakika wa kupata chakula halikadhalika mbinu za kujipatia kipato. Shirika la Umoja wa Mataifa la chakula na kilimo, FAO kwa msaada kutoka serikali ya Sweden imewezesha mradi wa kusaidia wakulima wadogo kwa kuwapatia pembejeo na msaada wa fedha na sasa kuna nafuu hasa kwenye jimbo la Hirshabelle nchini humo.
Ukame ambao haujawahi kutokea katika Pembe ya Afrika unaathiri jamii nzima, lakini ni wanawake na wasichana ambao wanalipa “gharama kubwa isiyokubalika,” limesema Shirika la Umoja wa Mataifa la idadi ya watu duniani na masuala ya afya ya uzazi UNFPA hii leo wakati likizindua ombi la dola milioni 113.7 ili kukidhi mahitaji yao.
Ukame uliolighubika eneo la Pembe ya Afrika kwa miongo minne mfululizo umesababisha changamoto kubwa kwa mamilioni ya raia wa Kenya, Ethiopia na Somalia nchi ambayo maeneo mengi yanakabiliwa na kutokuwa na uhakika wa chakula na hatihati ya kutumbukia kwenye baa la njaa. Mashirika ya misaada ya kibinadamu likiwepo la Umoja wa Mataifa la mpango wa chakula duniani WFP yako mstari wa mbele kuwasaidia watu wenye uhitaji hususani wa chakula.
Kamishna Mkuu wa shirika la Umoja wa Mataifa la kuhudumia wakimbizi duniani, UNHCR, Filippo Grandi amehitimisha ziara yake ya siku mbili nchini Somalia na kutoa wito kwa viongozi wa kimataifa kuongeza kasi ya usaidizi wa kibinadamu ili kuepusha janga la kibinadamu linalozidi kushika kasi kwenye taifa hilo lililokumbwa na ukame.
