Staffan de Mistura, Mjumbe Maalumu wa KM kwa Iraq, amelaani vikali msururu wa mabomu yalioripuliwa mji wa Baghdad hii leo asubuhi wakati raia walipokuwa wakielekea makazini, mashambulio haya yaliripotiwa kuuwa watu 18 na kujeruhi makumi kadha.
UM umearifiwa Israel imefungua, kwa muda, vivuko vya mipakani na Tarafa ya Ghaza, na kuruhusu misaada ya chakula kuingizwa kwenye maeneo yaliokaliwa kimabavu ya WaFalastina.
Kwenye risala iliotolewa, kwa kupitia msemaji wake, KM Ban Ki-moon ameshtumu vikali mashambulio ya Ijumapili dhidi ya makazi ya Raisi Bernardo Joao Vieira, yaliotukia Bissau, mji mkuu wa Guinea-Bissau yalioendelezwa na baadhi ya wanajeshi, wiki moja tu baada ya kufanyika uchaguzi wa bunge nchini humo.
Kwenye ukumbi wa Baraza la Udhamini asubuhi ya leo kumefanyika kikao maalumu, kilichodhaminiwa na Kamati ya Kusimamia Utekelezaji wa Haki Zisofutika za Umma wa Falastina kuhishimu Siku ya Ushikamano na Umma wa Falastina kwa kulingana na azimio la Baraza Kuu la UM liliopitishwa mwezi Disemba 1977.
Mjini Geneva, Uswiss kulifunguliwa rasmi, leo hii, kikao cha 9 cha Mataifa Yalioidhinisha Mkataba wa Kupiga Marufuku Mabomu Yaliotegwa Ardhini ambapo risala ya Raisi wa mkutano, Balozi Jurg Streuli ilikumbusha kwamba licha ya kuwa mabomu milioni 40 ya kutega yalifanikiwa kuangamizwa kimataifa, mapaka sasa, na wakati huo huo kilomita kadhaa za ardhi zilifufuliwa baada ya mabomu hayo kuteketezwa, hata hivyo majukumu makubwa na mazito bado yamesalia na yatakikana kufyeka silaha hizi ovu katika maeneo kadha wa kadha ya dunia.
Ripoti ya hivi karibuni ya KM, kuhusu hali ya watoto kwenye mazingira ya mapigano yaliopamba katika JKK imethibitisha kuteremka idadi ya vitendo vilivyokiuka sana haki za watoto nchini. Ripoti ilbainisha kupatikana maendeleo machache kwenye zile juhudi za kuwapokonya watoto silaha na kuwajumuisha kimaisha kwenye jamii za kawaida. Juu ya hivyo, ripoti ilisisitiza, watoto bado wanaendelea kuwawa mwanzo kuathiriwa kwenye mgogoro wa katika Kivu Kaskazini na Kusini pamoja na Katanga Kaskazini. Kadhalika, ripoti iliendelea kusema, watoto wenye umri mdogo hulazimishwa kushiriki kwenye mapigano, na wakati huo huo wanaendelea kunajisiwa na makundi mbalimbali yenye silaha, vitendo ambavyo, ripoti ilisema, vinafanyika kwa wingi zaidi kwenye maeneo ya vurugu.
Shirika la UM juu ya Huduma za Wahamiaji (UNHCR) limearifu ya kuwa na wasiwasi kuhusu usalama wa watu 70,000 waliong’olewa makazi na ambao wanaishi kwenye kambi ya Kibati, kaskazini ya vitongoji vya mji wa Goma, katika JKK.
Elizabeth Byrs, Msemaji wa Ofisi ya UM juu ya Misaada ya Dharura (OCHA) alithibitisha Ijumaa kwenye mkutano na waandishi habari mjini Geneva, juu ya hali ya wasiwasi na kigeugeu iliojiri kwa sasa katika Kivu Kaskazini, hali ambayo imeathiri hata wahudumia misaada ya kiutu kwenye eneo hilo:~
Juu ya hali ya afya katika Goma Shirika la Afya Duniani (WHO) limeripoti maambukizi ya kipindupindu yameonekana kuanza kupungua, katika eneo la vurugu, kama anavyoelezea Msemaji wa WHO, Paul Garwood pale alipokutana na waandishia habari Geneva:~~
Ripoti ya 2008 kuhusu namna Mataifa Wanachama yanavyotekeleza yale mapendekezo ya Mkataba wa Kupiga Marufuku Matumizi ya Mabomu Yaliotegwa Ardhini, iliowakilishwa rasmi hii leo katika UM, imebainisha nchi tatu wanachama zimeharamisha kanuni za Mkataba huo, kwa kushindwa kuangamiza silaha hizo kwa wakati; mataifa yenyewe ni Ugiriki, Uturuki na Belarus.
