Ripoti iliotolewa mjini Roma na Shirika la UM juu ya Chakula na Kilimo (FAO) iliozingatia matarajio ya akiba ya chakula duniani, imedhihirisha ya kuwa bei kubwa sana za chakula zilizokithiri katika soko la kimataifa sasa hivi, hudhuru zaidi walimwengu wanaoishi kwenye hali duni, umma ambao, ripoti ilitilia mkazo, hulazimika kutumia fungu kubwa la mapato yao kununua chakula.
Shirika la UM juu ya Huduma za Wahamiaji (UNHCR)limeripoti kushiriki kwenye juhudi za kuhudumia misaada ya kihali wale wahamiaji walioathirika karibuni na mashambulio ya chuki za wageni, yaliotukia katika jimbo la Gauteng, kaskazini mashariki katika Afrika Kusini.
KM Ban Ki-moon amewasili Myanmar Alkhamisi ambapo alikutana, kwa mashauriano na Waziri Mkuu, Jenerali Thein Sein na pia mawaziri wengineo ambao walisailia taratibu za kuchukuliwa kipamoja katika kuharakisha ugawaji wa misaada ya kihali kwa umma waliodhurika na janga la Kimbunga Nargis liliolivaa taifa hilo wiki tatu nyuma. Alasiri KM alipata fursa ya kuzuru eneo la Delta la Irrawaddy, na kujionea mwenyewe binafsi athari za uharibifu wa Kimbunga Nargis kieneo.
Ijumatano kwenye ukumbi wa Baraza Kuu,hapa Makao Makuu,wawakilishi wa Mataifa Wanachama 193 walikusanyika asubuhi kuchagua wajumbe 15 wa kuwakilishwa, kikanda, kwa kipindi cha miaka mitatu, kwenye Baraza la UM juu ya Haki za Binadamu (HRC) lenye makao yake Geneva, Uswiss. ~~
KM Ban Ki-moon amewasili Bangkok, Ijumatano na anatazamiwa kuelekea Myanmar Alkhamisi ambapo atazuru yale maeneo yaliogharikishwa na Kimbunga Nargis, na kushuhudia, binafsi, operesheni za kimataifa kuhudumia misaada ya kiutu, ya dharura, kwa waathiriwa wa tufani.
UM umeifadhilia Serikali ya Uchina msaada wa dola milioni 8 kutoka ule Mfuko wa Misaada ya Maafa ya Dharura au Mfuko wa CERF. Msaada huu utakuwa miongoni mwa michango ya kimataifa iliotolewa kuwahudumia kihali waathiriwa wa zilzala iliopiga nchini huko wiki iliopita katika jimbo la kusini la Sichuan, Uchina.
Ijumanne alasiri Baraza la UM kuhusu Maendeleo ya Uchumi na Jamii (ECOSOC) lilianzisha kikao maalumu cha siku mbili, kufuatilia na kuzingatia suluhu ya tatizo la chakula liliozuka duniani karibuni.
Shirika la UM juu ya Mfuko wa Maendeleo kwa Watoto (UNICEF) limeripoti kwamba tatizo la kuajiri watoto wenye umri mdogo, ambao hushirikishwa kimabavu kwenye vurugu la vita na mapigano, ni suala liliothibitishwa kuendelezwa katika 2008, kinyume na kanuni za kimataifa.
Ofisi ya UM juu ya Misaada ya Dharura (OCHA) imeonya ya kuwa taifa la Ethiopia linakabiliwa na upungufu mkubwa wa chakula, kwa sababu ya kupanda kwa bei za chakula katika soko la kimataifa, na pia kutokana na kutanda kwa ukame nchini.
Mashirika ya UM yaliopo Afrika Kusini leo yamebainisha kuingiwa wasiwasi na wahka mkuu kuhusu usalama wa wahamiaji waliopo nchini kutokea mataifa jirani, baada ya kushambuliwa katika siku za karibuni kwa sababu ya chuki za wageni. Mashambulio yalitukia na kuendelea kufanyika katika jimbo la Gauteng.
