Habari Mpya

KM Ban Ki-moon na Raisi wa Baraza Kuu Srgjan Kerim wametoa onyo la pamoja wiki hii lenye kutahadharisha kwamba bila ya walimwengu kutunza mazingira ya viumbe na uhai anuwai, matokeo yake yatasababisha athari mbaya kimaisha, hali ambayo itaharibu na kuchafua pakubwa shughuli za uchumi, huduma za maendeleo na zile juhudi za kudhibiti mabadiliko ya hali ya hewa, takriban kote ulimwenguni. Onyo hili liliwasilishwa na Mkurugenzi Mkuu wa Shirika la UM juu ya Hifadhi ya Mazingira, Achim Steiner, kwa niaba ya KM na Raisi wa Baraza Kuu kwenye mkutano wa kusailia sera za kutunza kipamoja viumbe anuwai, unaofanyika mjini Bonn, Ujerumani.

Ijumapili mataifa zaidi ya 50, yalihudhuria kikao maalumu mjini Yangon, Myanmar, kilichotayarsihwa kidharura na Wanachama wa Umoja wa Mataifa ya Kusini ya Asia (ASEAN) kwa makusudio ya kuchangisha fedha za kusaidia kihali fungu kubwa la umma wa Myanmar uliodhuriwa na Kimbunga Nargis kilichopiga huko tarehe pili Mei.

Kwenye taarifa ya kujibu shtumu za shirika la Uingereza la \'Save the Children\' liliodai UM hauripoti udhalilishaji wa kijinsia unaofanywa na walinzi wa amani, dhidi ya watoto wenye umri mdogo, KM Ban Ki-moon alilazimishwa kukumbusha tena kwamba taratibu kadha za UM zimeshaingizwa kwenye kanuni zinazosimamia shughuli za taasisi hii ya kimataifa, kote duniani, kwa madhumuni ya kuhakikishia Mataifa Wanachama kwamba pindi wanajeshi, au watumishi wa kiraia wa UM watakaoshitakiwa kuendeleza kashfa hiyo dhidi ya watoto watakabili haki na watahukumiwa adhabu wanayostahiki.

Naibu KM juu ya Masuala ya Kiutu, John Holmes aliwaambia wajumbe wa Baraza la Usalama Ijumanne kwamba fungu kubwa lenye kuathirika kihali na mali kunapojiri uhasama, vita na vurugu katika maeneo ya kimataifa ni mamilioni ya raia wasio hatia.

Naibu Kamishna Mkuu wa UM juu ya Haki za Binadamu, Kyung-wha Kang wiki hii ameanza ziara maalumu, ya pili, katika mataifa ya Cote d\'Ivoire na Liberia ambapo atafanya mazungumzo na viongozi wenye mamlaka, makundi yanayowakilisha jumuiya za kiraia, pamoja na wanadiplomasiya, na vile vile watumishi wa vyeo vya juu wa UM na kushauriana nao kuhusu hatua za kuchukuliwa kipamoja, zitakazohakikisha kadhia ya kuhifadhi haki za raia itatumiwa kuwa ni kipengele muhimu cha upatanishi miongoni mwa makundi yanayohasimiana, na pia katika kufufua kadhia za kiuchumi na jamii kwenye mataifa husika.

Shirika la UM juu ya Chakula na Kilimo (FAO) limewasilisha ripoti ya ajenda muhimu yenye kuwahimiza wajumbe wa kimataifa kuizingatia kikamilifu watakapokusanyika wiki ijayo Roma, Utaliana kuhudhuria Mkutano wa Hadhi ya Juu kuhusu Hifadhi Bora ya Chakula Duniani.

Kwenye hotuba ya ufunguzi wa Mkutano wa Kimataifa wa Siku Tatu mjini Tokyo kusailia Maendeleo katika Afrika, yaani Mkutano wa TICAD IV, Naibu KM wa UM Asha-Rose Migiro aliwahimiza wahisani wa kimataifa "kuongeza misaada maridhawa" inayohitajika kidharura kuimarisha shughuli za kilimo barani Afrika, hususan katika kipindi ambapo walimwengu wanakabiliwa na bei kubwa ya chakula katika soko la kimataifa, kitendo ambacho, alitilia mkazo NKM, kinahatarisha kuwadidimiza zaidi mamilioni ya watu Afrika kwenye fukuto la umasikini sugu.

Kikao cha 61 cha Baraza Kuu la Shirika la Afya Duniani (WHO) ambacho karibuni kilikamilisha mijadala ya wiki moja mjini Geneva, Uswiss kilifanikiwa kupitisha azimio muhimu, liliopendekeza Mataifa Wanachama kutayarisha mradi wa mwongozo utakaotumiwa katika zile juhudi za kuzuia, na kudhibiti bora matumizi haribifu ya unywaji wa vileo na pombe.

Elizabeth Byrs, Msemaji wa Ofisi ya UM juu ya Huduma za Dharura (OCHA) ameripoti kutoka Geneva kwamba hivi sasa juhudi za ugawaji wa misaada ya kiutu kwa waathiriwa wa Kimbunga Nargis zimefanikiwa kuwafikia watu milioni moja katika Myanmar, wingi wao wakiwa wakaazi wa mji mkuu wa Yangon. Kadhalika, aliripoti ya kuwa watu 470,000 nao pia walipatiwa huduma za dharura na mashirika ya kimataifa, ikiwa miongoni mwa watu milioni 2 muhitaji wanaoishi kwenye miji 15 iliopata madhara makubwa ya Kimbunga Nargis.

Hivi karibuni, Walter Kaelin, Mjumbe wa KM juu ya Wahamiaji wa Ndani Waliong’olewa Makwao, au Wahamiaji wa IDPs, alizuru Kenya kwa siku nne kutathminia hali ya wale watu waliohamishwa makazi kwa nguvu kutokana na vurugu liliozuka nchini kufuatilia uchaguzi wa taifa mnamo mwisho wa 2007.