Julien Harnels, Mwakilishi Mkaazi wa Shirika la UM juu ya Mfuko wa Maendeleo ya Watoto (UNICEF) katika JKK aliwaambia waandishi habari mjini Geneva leo hii kwamba matarajio ya siku za usoni ya watoto wanaoishi katika eneo la uhasama la Mashariki ya nchi, hayaridhishi hata kidogo na yanavunja moyo.
Ijumatatu Baraza Kuu la UM limeitisha kikao maalumu, cha wawakilishi wote, katika Makao Makuu ili kuzingatia usalama barabarani baada ya ripoti ya Shirika la Afya Duniani (WHO) kuonya ya kuwa athari zinazotokana na ajali za barabarani zimeanzisha “mgogoro mpya wa hatari, kwa afya ya jamii” takriban kote duniani. Kwa mujibu wa ripoti ya WHO athariza za ajali za barabarani zinalingana na madhara yanayotokana na maradhi ya kifua kikuu, malaria na UKIMWI dhidi ya umma wa kimataifa.
Shirika la UNICEF limeripoti faraja mwisho wa wiki iliopita baada ya kupokea taarifa kuhusu kuachiwa huru wale madereva wanne, watumishi wa Shirika la Maji la Sudan waliotekwa nyara wiki mbili nyuma katika jimbo la vurugu la Darfur Kaskazini. Madereva wanne hawa hivi sasa wamesharejeshwa kuungana na aila zao. Lakini vile vifaa vya thamani vilivyobebwa kwenye magari ya madereva wa Shirika la Maji la Sudan havijapatikana tena na vimepokonywa na maharamia. Huduma shirika za za maji zinazotekelezwa na Shirika la Maji la Sudan pamoja na UNICEF katika Darfur Kaskazini huwasaidia makumi elfu ya raia wa eneo hilo kupata maji safi ya kunywa na matumizi ya nyumba.
Ijumatatu, wajumbe wanaokadiriwa 1,200 kutoka Mataifa Wanachama 160 ziada walijumuika mjini Bangkok, Thailand kuanza duru ya kwanza ya mazungumzo ya siku tano, yanayoungwa mkono na UM, kuzingatia na kusailia mapatano mapya ya kudhibiti bora athari za mabadiliko ya hali ya hewa duniani.
UNHCR imeripoti kwamba kuanzia 2008 walirajisisha raia 15,000 wa kutoka Usomali ambao waliomba kupatiwa mahali pa hifadhi katika mataifa jirani ya Kenya, Djibouti, Ethiopia na Sudan mashariki.
Tarehe 25 Machi iliadhimishwa kwenye Makao Makuu na UM, kwa mara ya kwanza kihistoria, kuwa ni Siku ya Kumbukumbu za Kimataifa kwa Waathiriwa wa Utumwa na Biashara ya Utumwa katika Ngambo ya Bahari ya Atlantiki. Kwenye taadhima za siku hiyo kulifanyika warsha maalumu kuzingatia \'athari na makovu ya utumwa kwa binadamu\'; na vile vile kuliandaliwa maonyesho na tafrija aina kwa ina za kukumbusha umma na kuwaelimisha kuhusu msiba na madhara yalioletwa na utumwa.
Wiki hii Shirika la UM juu ya Huduma za Wahamiaji (UNHCR) limeripoti tukio la kihistoria ambapo operesheni za kurejesha wahamiaji wa Sudan wa Kusini zilirajisiwa kukamilisha jumla ya wahamiaji 100,000 waliofanikiwa kurejeshwa makwao, kwa khiyari, kutoka mataifa jirani ya Uganda, Kenya na Ethiopia. Wahamiaji hawa walikuwa wakiishi kwa muda mrefu kwenye nchi jirani kufuatia mapigano yaliozuka kwenye maeneo yao katika siku za nyuma.
Kamisheni ya UM Kufuatilia Ujenzi wa Amani kwenye yale mataifa yaliobuka kutoka mazingira ya vurugu na mapigano, imewasilisha ripoti mpya kuhusu hali nchini Burundi ambapo ilisema jumuiya ya kimataifa ina wasiwasi juu ya uamuzi wa lile kundi la Palipehetu-FNL wa kujitoa na kutoshiriki kwenye Utaratibu wa Jumla wa Pamoja wa Kusimamia na Kuthibitisha Kusitishwa kwa Mapigano, mradi ambao ulianzishwa 2006.
Alkhamisi wajumbe 47 wanachama wa Baraza la Haki za Binadamu walipitisha Geneva maazimio sita muhimu kuhusu taratibu za kuimarisha haki za kimsingi za binadamu duniani. Miongoni mwa maazimio hayo muhimu lilikuwemo pendekezo maalumu liliopitishwa, kwa kauli moja, na bila ya kura, ambalo lilionya Mataifa Wanachama yote dhidi ya tabia ya kutafautisha kisheria watu, kwa sababu ya jadi, asili, dini au kabila, kwa kisingizio ya kupiga vita ugaidi.
Naibu KM (NKM) wa UM, Asha-Rose Migiro Alkhamisi alihutubia Mkutano wa Kuzingatia Hali ya Dunia kwa Sasa uliofanyika Chuo Kikuu cha Columbia, mjini New York ambapo alidhihirisha kwamba kumepatikana matokeo ya mchanganyiko kwenye zile juhudi za kimataifa za kukamilisha, kwa wakati, Malengo ya Maendeleo ya Milenia (MDGs) yaliokusudiwa kupunguza umasikini kwa nusu katika nchi zinazoendelea itakapofika 2015.
