Habari Mpya

Leo ni siku ya watoto duniani maudhui yakiwa "kutafakari dunia bora kwa kila mtoto", na watoto kutoka kila kona ya dunia kupitia shirika la Umoja wa Mataifa la kuhudumia watoto UNICEF, wameandika shairi kufikisha ujumbe muhimu kwa viongozi wa dunia hii, wazazi na jamii wakitaka sauti zao zisikike na hatua zichukuliwe kulinda kizazi hiki na vijavyo.

Mashirika ya Umoja wa Mataifa likiwemo la mpango wa chakula duniani WFP na la kuhudumia Watoto UNICEF, leo yameelezea hofu yake ya kushindwa kuwafikia wakimbizi 100,000 wakiwemo watoto katika jimbo la Tigray Ethiopia kwa misaada muhimu ya kuokoa maisha ikiwemo chanjo na elimu.

Filamu ya maisha halisi iliyotengenezwa na shirika la kazi la Umoja wa Mataifa ILO kwa kushirikiana na kampuni ya PhotoDoc Association ya nchini Mynmar, imeonesha madhila mazito wanayoyapata watoto wanapotumikishwa katika ajira katika umri mdogo.

Mkurugenzi mkuu wa shirika la afya la Umoja wa Mataifa WHO, Dkt. Tedros Adhanom Ghebreyesus, amesema anaumia na kupata uchungu mkubwa moyoni kufuatia hali ya machafuko inayoendelea Ethiopia nchi anakotoka ,na amertoa wito kwa pande zote katika mzozo kufanya kila liwezikanalo kwa ajili ya kurejesha amani na kuhakikisha ulinzi wa raia na pia kutoa fursa za huduma za afya na misaada ya kibinadamu kwa wale wanao ihitaji. 

Mpango wa Umoja wa Mataifa nchini Sudan Kusini UNMISS umeshaanza rasmi kuyageuza makazi ya ulinzi wa raia (POCs) na kuwa makambi ya kawaida ya wakimbizi wa ndani kama ulivyoahidi.

Ripoti mpya ya shirika la Umoja wa Mataifa la kuhudumia watoto, UNICEF imeonya kuwepo kwa ongezeko kubwa la madhara ya janga la ugonjwa wa Corona au COVID-19 kwa watoto wakati huu ambapo janga hilo linaelekea kuingia mwaka wa pili. 

Shirika la Umoja wa Mataifa la kuhudumia watoto UNICEF linaendelea kushirikiana na Serikali ya Uganda, sekta binafsi na washirika wengine kuhamasisha makampuni na wadau wote kuhusu haki za watoto na pia katika shughuli zao za kila siku, kuwa na sera rafiki za watoto. Hiyo ni kutokana na watoto wengi kutumikishwa katika shughuli mbalimbali za kiuchumi badala ya kuwa shuleni kama anavyoeleza mtoto Lawrence katika taarifa hii inayosimuliwa na Anold Kayanda. 

Maelfu kwa maelfu ya wakimbizi wa Ethiopia kutoka jimbo la Tigray wanaokimbilia Sudan kunusuru maisha yao, wanapitia madhila mengi ikiwa ni pamoja na kupoteza wapendwa wao na kutojua mustakabali wao limesema shirika la Umoja wa Mataifa la kuhudumia wakimbizi UNHCR.

Shirika la Umoja wa Mataifa la kuhudumia Watoto UNICEF leo limekaribisha tangazo la serikali ya Jamhuri ya Kidemokrasia ya Congo DRC, linalothibitisha kumalizika kwa mlipuko wa karibuni wa Ebola katika jimbo la Equateur Kaskazini Magharibi mwa nchi hiyo.

Hii leo ikiwa inaanza wiki ya kukuza uelewa kuhusu dawa za viuavijiumbemaradhi, shirika la chakula na kilimo la Umoja wa Mataifa, FAO, linasema ijapokuwa dawa hizo zina lengo jema, lakini zikitumika vibaya zinachangia katika kutokea kwa usugu na hivyo kugeuka kuwa tatizo.