Habari Mpya

Baraza la Usalama Ijumatano lilikutana kwenye kikao maalumu, cha hadhi ya juu, kilichofanyika kwenye Makao Makuu mjini New York, kwa madhumuni ya kujadilia namna ya kuongeza ushirikiano halisi na ushikamano wa kuridhisha kati ya UM na taasisi zake, hasa ile taasisi ya Baraza la Usalama, pamoja na Umoja wa Afrika (UA), hususan kwenye juhudi za kuzuia na kutatua kwa amani migogoro iliolivaa bara la Afrika. Kwenye hotuba alioitoa KM Ban Ki-moon katika mkusanyiko wa Baraza la Usalama, alisistiza ya kuwa utaratibu unaochukuliwa na jumuiya ya kimataifa kusuluhisha fujo na mizozo iliopo Afrika, kwa njia za amani, ni lazima ukuzwe na upewe umuhimu wa hadhi ya juu na UM pamoja na Umoja wa Afrika.

Shirika la UM juu ya Miradi ya Chakula Duniani (WFP) limetangaza leo kwamba kuanzia mwezi ujao wa Mei litalazimika kupunguza kwa nusu, ile posho ya chakula inayopeleka kwenye jimbo la uhasama la Darfur, Sudan kwa sababu malori yalioajiriwa na UM yenye kuchukua shehena ya chakula bado yanaendelea kushambuliwa na maharamia. Vitendo hivi tuliarifiwa huzorotisha sana huduma za kufadhilia misaada ya chakula kwa umma muhitaji katika Darfur.

Ripoti ya karibuni ya KM kuhusu Sahara ya Magharibi imekaribisha, kwa ridhaa kuu, ahadi za makundi husika na mzozo huo, yaani Serikali ya Morocco na kundi la ukombozi wa Sahara Magharibi la Frente POLISARIO, kuendelea kushiriki kwenye majadiliano ya upatanishi. Lakini KM alionya kwamba kasi ya mazungumzo haitoweza kusarifiwa bila ya kwanza \'kukwamua mzoroto uliopo wa kisiasa, kwa moyo wa kuelewana na uhalisia wa kutoka pande zote mbili.\' Ripoti ya KM ilisema hali ya mazungumzo ilivyo sasa hivi haikubaliki kamwe, katika kusukuma mbele juhudi za upatanishi na ni lazima irekibishwe.

KM wa UM Ban Ki-moon amewasilisha ripoti maalumu majuzi kuhusu operesheni za Shirika la UM juu ya Ulinzi wa Amani Mipakani Ethiopia/Eritrea (UNMEE), Ripoti imependekeza kwa jumuiya ya kimataifa kuzingatia kidharura changuzi nne muhimu, kusailia kama huduma za amani bado zinahitajika kuendelezwa kwenye eneo la uhasama katika Pembe ya Afrika au zisitishwe, hususan baada ya wenye madaraka Eritrea kuamua kuweka vikwazo kwenye upande wao wa mpaka, hali ambayo ilikwamisha na kozorotisha operesheni za amani za UM.

Baraza la Usalama (BU) asubuhi ya leo lilifanyisha kikao maalumu cha hadhi ya juu, kuzingatia taratibu mbadala, zitakazotumiwa kuimarisha uhusiano bora kati ya UM na Umoja wa Afrika, hususan katika huduma za kusawazisha usalama na amani wa kieneo na kimataifa.

Shirika la UM juu ya Ulinzi wa Amani katika JKK (MONUC) limethibitisha kwamba ndege ya abiria ya kampuni ya ndege inayoitwa Hewa Bora ilianguka na kupasuka hapo Ijumanne, muda tu baada ya kuanza kuruka, katika mji wa kaskazini-mashariki wa Goma katika JKK. Iliripotiwa na Msemaji wa KM kwamba ndege ilikuwa imebeba abiria na wafanyakazi wa ndege 70 ziada.

Mjumbe Maalumu wa KM katika JKK, Alan Doss jana Ijumanne alizungumzia kikao cha faragha cha Baraza la Usalama kuhusu maendeleo kwenye shughuli za UM za kusawazisha usalama na amani katika Jamhuri ya Kidemokrasi ya Kongo (JKK) na athari zake kwa mataifa jirani.

Wiki hii Shirika la UM kuhusu Haki za Wafanyakazi wa Kimataifa (ILO) limetoa ripoti mpya inayoelezea kupatikana marekibisho ya kutia moyo duniani, kuhusu mitizamo ya wafanyakazi wa kimataifa kwa wenziwao waliopatwa na virusi vya UKIMWI.

Tume ya Kimataifa Maalumu ya Wataalamu 400 waliodhaminiwa bia na Benki Kuu ya Dunia pamoja na mashirika kadha ya UM, imetoa mwito wa dharura uliojumuishwa kwenye ripoti iliopendekeza kufanyike mageuzi makali ya kimsingi, haraka iwezekanavyo, kwenye taratibu zinazotumiwa kuzalisha mazao ya chakula, ili kuhakikisha marekibisho haya mapya yatakidhi zaidi mahitaji ya watu masikini na wale wenye njaa.

Shirika la UM juu ya Miradi ya Chakula Duniani (WFP) limetoa onyo maalumu leo kwamba Jamhuri ya Kidemokrasia ya Umma wa Korea (DPRK) inakabiliwa na tatizo hatari la upungufu wa chakula kwa sababu ya mavuno haba, hali ambayo ilitokana na matatizo kadha, ikiwemo maafa ya mafuriko yaliotukia nchini humo mwaka jana.~