Habari Mpya

Ghana imekabidhiwa uraisi wa Baraza la Usalama kwa mwezi Oktoba. Mwakilishi wa Kudumu wa Ghana katika UM, Balozi Leslie Kojo Christian aliitisha mkutano wa waandishi habari wa kimataifa katika Makao Makuu ambapo aliwaarifu kuhusu ajenda ya vikao vijavyo kwa mwezi Oktoba. Balozi Christian alidhihirisha ya kuwa ajenda ya mijadala italenga zaidi yale matatizo yanayohusu hali katika Usomali na Cote d’Ivoire, na pia alitarajia kusailiwa masuala juu ya haki za wanawake, pamoja na mada zinazoambatana na juhudi za kimataifa za kuimarisha usalama na amani duniani.

KM Ban Ki-moon, akiungwa mkono na maofisa kadha wa vyeo vya juu katika UM, ameshtumu vikali mauaji ya wanajeshi wanaolinda amani wa Umoja wa Afrika Sudan (AMIS), yaliofanyika mwisho wa wiki iliopita katika mji wa Haskinita, Darfur Kusini.

Shirika la UM juu ya Amani kwa Sudan (UNMIS) limeripoti watumishi wa mashirika yasio ya kiserekali (NGOs) wanaohudumia misaada ya kiutu katika eneo hilo la vurugu bado wanaendelea kushambuliwa kihorera na makundi mbalimbali ya waasi na wahalifu wengine.

Kwenye mjadala wa wawakilishi wote kwenye Baraza Kuu la UM, Waziri wa Mambo ya Nje wa Sudan Lam Akol alinasiihi kwenye risala yake ya kuwa majadiliano ya kidiplomasiya ndio njia pekee iliosalia kutumiwa na jumuia ya kimataifa yenye uwezo wa kukomesha vurugu la Darfur.

Shirika la UM juu ya Huduma za Wahamiaji (UNHCR) limeripoti kuwa linakabiliwa na upungufu mkubwa wa fedha ambazo zinahitajika haraka kutumiwa kwenye zile huduma za kuwarejesha makwao Sudan Kusini wahamiaji waliopo mataifa jirani, na pia kuwahudumia kihali wahamiaji milioni 2 wengine wa kutoka Darfur magharibi.

Ofisi ya UM juu ya Misaada ya Dharura Duniani (OCHA) imeripoti mafuriko bado yanaendelea kuisumbua Uganda, hali ambayo imeilazimisha UM kuendeleza zile operesheni za kuhudumia misaada ya kihali ya kunusuru maisha ya raia waathiriwa na janga hili la kimaumbile. OCHA imeripoti kuhitajia mchango ziada wa dharura, kuweza kukidhia mahitaji ya kimaisha ya umma husika.

Watumishi wa UM wanaohudumia misaada ya kiutu Kivu Kaskazini, katika Jamhuri ya Kidemokrasi ya Kongo (DRC) wiki hii walifanikiwa kuwafikia wale wahamiaji wa ndani ya nchi walionyimwa mahitaji yao ya kihali katika siku za nyuma, kwa sababu ya kufumka kwenye maeneo yao mapigano kati ya vikosi vya Serekali na waasi.

UM na washirika wake kadha wametoa mwito maalumu kwa jamii ya kimataifa unaopendekeza wafadhiliwe haraka dola milioni 10 ili kuhudumia afya, makazi na vifaa vya nyumba kwa watu 75,000 walioathirika na mafuriko Ghana kaskazini. Mafuriko haya yalioselelea tangu Agosti yalisababishwa na maji kujaa kwenye Mito ya Volta Nyeupe na Nyeusi.

KM Ban Ki-moon amepitisha mwito unaothibitisha kwamba Liberia inastahili kupokea msaada wa fedha za maendeleo kutoka Mfuko wa UM juu ya Ujenzi wa Amani. Kadhalika KM ameliamrisha Shirika la Ulinzi wa Amani la UM katika Liberia (UNMIL) lianze kushauriana na wenye madaraka Liberia pamoja na mashirika ya kiraia na kuandaa ni miradi gani itafaa kupewa umbele katika kupokea misaada hiyo ya UM.

Kwa kufuatana na taarifa za UM kuhusu maradhi hatari duniani imethibitishwa ugonjwa wa saratani ni miongoni mwa maradhi mazito ambayo bado yanaendelea kusumbua umma wa kimataifa. Kwa mujibu wa ripoti, saratani kila mwaka husababisha idadi kubwa ya vifo kushinda maradhi ya UKIMWI, kifua kikuu na malaria yakijumlishwa pamoja.