Habari Mpya

Shirika la Umoja wa Mataifa la Kuhudumia Wakimbizi (UNHCR), na mashirika 64 ya kibinadamu na kiraia leo Septemba 04 yametoa wito wa dola bilioni 1 kutoa msaada muhimu na ulinzi kwa zaidi ya watu milioni 1.8 wa Sudan wanaotarajiwa kuwasili katika nchi tano jirani ifikapo mwisho wa 2023, wakikimbia vita vinavyoendelea nchini mwao Sudan.

"Ni dhahiri shahiri kuwa wanachama wachanga zaidi wa Bara la Afrika ambao ni watoto wa Kiafrika wanabeba mzigo mkubwa wa athari mbaya za mabadiliko ya tabianchi,” amesema leo Naibu Mkurugenzi wa Shirika la Umoja wa Mataifa linalohusika na masuala ya watoto UNICEF kanda ya Mashariki na Kusini mwa Afrika Lieke van de Wiel.

Mkutano wa vijana wa Afrika kuhusu tabianchi ukianza leo huko Nairobi nchini Kenya, Katibu Mkuu wa Umoja wa Mataifa António Guterres amewaambia vijana waendelee kupaza sauti zao za hatua kwa tabianchi ili kunusuru sayari dunia.

Ofisi ya Umoja wa Mataifa kuhusu haki za binadamu, (OHCHR) imesema imekumbwa na hofu kubwa juu ya taarifa za vifo vya watu takribani 43 huko Goma, jimboni Kivu Kaskazini nchini Jamhuri ya Kidemokrasia ya Congo, DRC, vifo vilivyotokea wakati wa maandamano dhidi ya Umoja wa Mataifa na mashirika mengine siku ya Jumatano ambako pia watu 56 walijeruhiwa.

Takribani Watoto milioni moja wenye umri wa chini ya miaka 5 nchini Mali wako hatarini kutumbukia kwenye utapiamlo  uliokithiri kutokana na mchanganyiko wa mzozo wa muda mrefu, ukimbizi wa ndani na vikwazo vya kufikisha misaada ya kibinadamu. 

Viongozi wa Afrika wanatarajiwa kukutana jijini Nairobi, Kenya wiki ijayo kwa ajili ya mkutano wa mabadiliko ya tabianchi ambako watajadili njia mbalimbali za kupunguza utoaji wa gesi chafuzi huku wakija na mbinu za kukabiliana na athari za hali ya hewa. 

Peter Omondi kutoka shirika la vijana la Global Youth Forum nchini Kenya ni mmoja wa vijana ambao mapema mwezi huu kwa kushirikiana na Kituo cha Habari cha Umoja wa Mataifa, UNIS Nairobi waliandaa mechi ya mpira wa miguu iliyohusisha zaidi ya vijana 100 katika Kaunti ya Siaya ili kusongesha Malengo ya Maendeleo Endelevu.