Habari kwa Ujumla

Kuelekea siku ya UKIMWI duniani tarehe Mosi mwezi ujao wa Desemba, Doreen Moraa Moracha, msichana kutoka Kenya ambaye anaishi na virusi vya UKIMWI amekuwa changamoto kubwa katika kumaliza unyanyapaa dhidi ya watu wanaoishi na virusi vya Ukimwi au VVU. Doreen amekuwa akifanya hivyo kupitia mitandao ya kijamii na kubwa zaidi katika mahojiano  yake na Idhaa ya Kiswahili ya Umoja wa Mataifa, UN NEWS Kiswahili  anajiita yeye ni simulizi ya kupendeza, kulikoni?

Umoja wa Mataifa umesema jamii ikiwa ni pamoja na mashirika yasiyo ya kiserikali, asasi za kiraia na wanaharakati wana mchango mkubwa katika vita dhidi ya UKIMWI. 

Shirika la mpango wa chakula duniani, WFP limesitisha kwa muda usambazaji wa misaada ya kibinadamu huko Beni, jimboni Kivu Kaskazini nchini Jamhuri ya Kidemokrasia ya Congo, DRC kutokana na mashambulizi yaliyoripotiwa kwenye maeneo yenye mlipuko wa Ebola. 

Siku 16 za kupinga ukatili wa kijinsia dhidi ya wanawake na wasichana zinaendelea kuadhimishwa kote duniani.  Ukatili ambao Umoja wa Mataifa unasema sio tu unaathiri mamilioni ya kundi hilo na kukiuka haki zao za binadamu bali pia unaacha jeraha lisilokwisha katika akili na maisha ya wanawake na wasichana duniani. Sasa Umoja huo unahimiza nchi zote, mashirika, asasi za kiraia na wadau kuhakikisha wanapambana kwa kila njia kutokomeza jinamizi hili kwani ni chini ya asilimia 10 ya wanawake na wasicha wanaoathirika ndio wanaouripoti.

Katika mapambano dhidi ya Virusi Vya UKIMWI, VVU na UKIMWI nchini Jamhuri ya Afrika ya Kati, vikundi vya kijamii vinavyoundwa na watu wanaoishi na VVU vinasaidia kusambaza dawa katika maeneo ambayo yana ugumu wa kufikiwa kutokana na usalama mdogo na uhaba wa huduma za kiafya, juhudi ambazo zimewasaidia wengi kama ilivyo katika vijiji vya Zemio. 

Muungano wa Afrika AU na shirika la chakula na kilimo la Umoja wa Mataifa FAO wamesema wanaimarisha ushirikiano wao ili kuhakikisha uchumi wa kilimo barani Afrika unaleta tija kwa mamilioni ya watu wa bara hilo.

Siku 16 za kupinga ukatili dhidi ya wanawake zikiendelea kuangaziwa duniani, nchini Sudan Kusini nako Umoja wa Mataifa umetumia kipindi hiki kutoa fursa kwa wanawake kupaza sauti zao huku ukimulika pia hatua za kuwawezesha kiuchumi wanawake hao.  John Kibego na taarifa kamili.

Mjini Juba, nchini  Sudan Kusini, maandamano yakiongozwa na Mwakilishi wa kudumu wa Umoja wa Mataifa nchini David Shearer akiambatana na wanawake na wanaume, kuashiria kampeni ya kupinga ukatili dhidi ya wanawake wakipaza sauti sasa imetosha.

Shirika la Umoja wa Mataifa la kuhudumia watoto UNICEF limetaka mkazo utolewe pia kukabiliana na ugonjwa wa surua ambao linasema unaua idadi kubwa ya watoto wa chini ya umri wa miaka mitano kuliko hata Ebola nchini Jamhuri ya Kidemokrasia ya Congo DRC. 

Katika visiwa vya Pacifiki kati ya asilimia 75 hadi 90 ya wachuuzi sokoni ni wanawake na kwa kutambua umuhimu wao na mchango wao katika jamii  shirika la Umoja wa Mataifa linalohusika na masuala ya wanawake UN Women liliamua kuanzisha mradi wa masoko kwa kwa ajili ya mabadiliko au M4C kwa ajili ya kuwawezesha wanawake hao na familia zao.