Shirika la UM juu ya Huduma za Wahamiaji (UNHCR) nalo pia linaendelea na juhudi za kuwahudumia kihali maelfu ya wahamiaji wa ndani wa JKK. Ijumatatu, ndege iliokodiwa na UM, iliochukua tani 36 ya mahitaji ya kufarajia umma huo, iliwasili Entebbe, Uganda.
Israel inaripotiwa imeamua kufungua kile kituo kinachotumiwa na yale malori ya kugawa nishati, katika eneo liliokaliwa kimabavu la Tarafa ya Ghaza. Uamuzi huo umeruhusu ugavi wa mafuta ya dizeli kwa kinu pekee cha taa katika Tarafa ya Ghaza, siki moja tu baada ya kiwanda hicho kiliposimamisha shughuli zake kwa sababu ya ukosefu wa nishati.
Dktr Cephas Lumina, Mtaalamu Maalumu wa UM juu ya Haki za Binadamu juu ya athari za madeni kwa ustawi wa uchumi wa nchi zinazoendelea alinakiliwa kwenye ripoti alioitoa kabla ya Mkutano wa Doha, utakaofanyika katika siku za karibuni, ya kwamba Nchi Wanachama zitakazohudhuria kikao hicho zitalazimika kukamilisha juhudi za pamoja za kupunguza mzigo huo wa madeni.~~
Leo Ijumanne, KM Ban Ki-moon leo alikuwa na mahiojiano ya kila mwezi na waandishi habari wa kiamataifa waliopo hapa Makao Makuu. Kwenye mkusanyiko huo KM alisailia juhudi za karibuni za kukabiliana na mgogoro wa fedha katika soko la kimataifa, pamoja na kuzingatia matatizo ya athari za mabadiliko ya hali ya hewa duniani.
Shirika la UM juu ya Miradi ya Chakula Duniani (WFP) linajitayarisha sasa hivi kuongeza mara mbili zaidi idadi ya watu watakaohudumiwa chakula mwezi Novemba nchini Zimbabwe; na kwa wakati huo huo WFP imetahadharisha italazimika kupunguza posho ya chakula inayogawa kwa umma Zimbabwe kwa sababu ya upungufu wa fedha za kukidhia mahitaji yao. Hivi sasa WFP imeomba ifadhiliwe na wahisani wa kimataifa msaada wa dola milioni 140, fedha zinazohitajika kuendesha operesheni zake kuanzia kipindi cha sasa hadi mwisho wa Machi 2009. Mnamo mwezi Oktoba, kipindi ambacho WFP ilipoanzisha operesheni zake kubwa za kugawa chakula Zimbabwe, ilifanikiwa kugawa tani 29,000 za posho za chakula kwa umma unaokadiriwa milioni mbili.~
Shirika la UM juu ya Ulinzi wa Amani katika JKK (MONUC) limeripoti kufunguka mapigano mapya kwenye uwanja wa mapambano karibu na eneo la Ngungu, kilomita 60 (maili 37) magharibi ya mji wa Goma.
Kadhalika, mashirika ya kimataifa yenye kuhudumia misaada ya kiutu kwenye eneo la uhasama, ikijumlisha Shirika la Madaktari Wasio na Mipaka (MSF) yametahadharisha ugonjwa wa kipindipindu huenda ukaenea, kwa kasi kubwa, dhidi ya afya ya raia, kwenye yale maeneo ya mapigano yaliopo karibu na mji wa Goma.
Mwisho wa wiki iliopita wajumbe waliohudhuria mkutano wa Nairobi ulioandaliwa na Umoja wa Afrika kuzingatia mgogoro wa Jamhuri ya Kidemokrasi ya Kongo, mkutano ambao uliungwa mkono na UM na kuhudhuriwa na KM Ban Ki-moon, walitoa taarifa maalumu ya pamoja, ilioyanasihi makundi yanayohasimiana kusimamisha mapigano yao haraka katika eneo la mashariki na kuyataka yashirikiane kwenye majadiliano ya kusluhisha mvutano wao kwa njia ya amani.
Mauaji ya raia yaliofanywa na waasi wiki iliopita, kwenye mji wa Kiwanja, uliopo sehemu za mashariki, katika JKK ni tukio ambalo Mjumbe Maalumu wa KM kwa Jamhuri ya Kidemokrasi ya Kongo, Alan Doss amelifananisha na “makosa makubwa ya jinai ya vita”.
Wakati huo huo, kwenye kikao cha dharura kilichohudhuriwa na Wakuu wa Taifa na Serikali wanachama wa Jumuiya ya Kiuchumi ya Mataifa ya Kusini ya Afrika (SADC), kilichofanyika Ijumapili kwenye mji wa Sandton, Afrika Kusini kulipitishwa mapendekezo kadha, ikiwemo ile rai ya kutuma washauri wa kijeshi kusaidia vikosi vya Serikali kukabiliana na vurugu linaloendelea kutanda katika JKK, pindi Serikali ya huko itatuma ombi la kuhitajia msaada huo. ~
