Tume maalumu ya watu 13, iliojumlisha wataalamu, viongozi waliostaafu wa mataifa pamoja na mawaziri wa afya kwenye ripoti iliowasilishwa Alkhamisi waliafikiana, baada ya kuendeleza uchunguzi wa miaka mitatu, kwamba "ukosefu wa haki za kijamii ni tukio linalosababisha vifo vya watu ulimwenguni kwa kiwango kikubwa kabisa".
UM inashiriki kwenye huduma za kuwasaidia kurejea makwao wageni kadhaa waliong’olewa makazi Afrika Kusini, kwa sababu hawana furaha na maisha wanaoongoza nchini humo kwa sasa, hasa baada ya kufumka vurugu la chuki za wageni katika mwezi Mei lilioenea nchini humo kwa wakati huo.
Tume ya Utendaji ya UM juu ya Watu Waliotoweka Kimabavu itaadhimisha miaka 25 ya Siku ya Kimataifa ya Kuwakumbuka Waliotoweka Duniani. Siku hiyo huadhimishwa kila mwaka mnamo tarehe 30 Agosti.
Shirika la UM juu ya Mfuko wa Maendeleo kwa Watoto (UNICEF) limearifu kujiunga na Wizara ya Afya ya Guinea-Bissau kupiga vita janga la kipindupindu liliozuka na kuenea kwa kasi nchini humo katika wiki za karibuni.
Ofisi ya Kamishna Mkuu wa Haki za Binadamu imetoa taarifa mjini Geneva Ijumaa ilioshtumu vikosi vya usalama vya Sudan kwa kutumia nguvu isiowiana na makosa yanayodaiwa kufanyika katika kambi ya wahamiaji wa ndani ya Kalma, katika Darfur.
John Holmes, Naibu KM juu ya Masuala ya Kiutu na Mshauri kuhusu Misaada ya Dharura ya UM anatarajiwa kuwasili Ethiopia Septemba mosi kushauriana na Serikali juu ya namna ya kuwasaidia kudhibiti tatizo la njaa liliofumka kwa sababu ya kutanda kwa ukame mbaya nchini humo.
KM BanKi-moon amepongeza taarifa ya Serikali ya Zimbabwe kuondosha vikwazo dhidi ya operesheni za ndani ya nchi za mashirika yasio ya kiserkali na yale mashirika ya binafsi ya kujitolea. Alisema KM maendeleo haya ya kutia moyo yatasaidia kuhakikisha misaada ya kiutu ya kimataifa itagawiwa umma wa Zimbabwe bila upendeleo ili kunusuru maisha na kuwapatia kinga boraya afya.~
Shirika la UM juu ya Huduma za Wahamiaji (UNHCR) limeripoti kukaribisha ripoti za kuachiwa huru kwa mkuu wa tawi la ofisi yao katika Usomali ambaye alitekwa nyara mnamo tarehe 21 Juni (2008) karibu na nyumba yake mjini Mogadishu na kundi la watu wasiojulikana waliokuwa wamechukua silaha.
Rodolphe Adada, Mjumbe Maalumu wa Pamoja wa UM/UA kwa Darfur ameamrisha kupeleka kwenye kambi ya Kalma ya wahamiaji wa ndani katika jimbo la Darfur Kusini, timu ya maofisa wa mapolisi, washauri wa kijeshi, wahudumia haki za kibinadamu na vile vile maofisa wanaohusika na masuala ya kiraia kufanya uchunguzi juu ya tukio liliojiri mapema wiki hii huko ambapo wahamiaji wa ndani (IDPs) 31 waliuawa baada ya mapambano na vikosi vya usalama vya Sudan.
Mpatanishi Mkuu wa Pamoja wa UM-UA kwa Darfur, Djibril Bassole amewasili kuanza kazi rasmi katika El Fasher hii leo, mji mkuu wa Darfur Kaskazini na ambapo pia yalipo makao makuu ya UNAMID. Baadaye Bassole ataelekea Nyala na El Geneina, miji mikuu ya Darfur Kusini na Magharibi.~~
