Habari Mpya

Taasisi tatu zinazohusika na huduma za maendeleo - yaani Benki Kuu ya Dunia, Benki ya Maendeleo Afrika (AfDB) na pia Taasisi ya Ushirikiano Mpya wa Maendeleo ya Afrika (NEPAD) - ambazo zinakutana hivi sasa Tunis, Tunisia kuhudhuria Wiki ya Maendeleo ya Huduma za Maji Afrika, zimetoa mwito wa pamoja unaohimiza wahisani wa kimataifa kukithirisha msaada wao wa fedha zinazohitajika, kidharura, kufadhilia Usimamizi Bora wa Matumizi ya Maji kwa Kilimo katika Afrika, hasa kwenye miradi ya kutunza maji ya mvua, udhibiti bora wa mabomba ya maji na, pia, kilimo cha umwagiliaji maji.

Wawakilishi wanachama wa Kamisheni juu ya Maendeleo ya Jamii (KMJ) walikusanyika karibuni kwenye Makao Makuu ya UM mjini New York kuhudhuria kikao cha mwaka, ili kuzingatia masuala anuwai yanayohusu huduma za kuimarisha maendeleo ya jamii mathalan, taratibu za kufuatwa kimataifa kukuza ajira, nidhamu ya kukimu mahitaji ya umma unaozeeka pamoja na kuzingatia yale masuala yenye kutatanisha maisha ya watu walemavu duniani.~

Mashirika 39 ya kimataifa yanayohudumia misaada ya kiutu Usomali yametangaza onyo lenye kutahadaharisha kwamba, kutokana na hali ya wasiwasi iliojiri nchini humo hivi karibuni, kuna hatari ya kufumka maafa yasio kifani kwenye eneo hilo la Pembe ya Afrika.

Mashirika ya UM yanayohusika na misaada ya kiutu - ikijumuisha zile taasisi zinazohusika na maendeleo ya watoto, UNICEF; afya, WHO; Misaada ya Dharura, OCHA na pia usalama, UNDSS – yametangaza kipamoja kwamba yameshijiandaa kuhudumia misaada ya dharura Masiwa ya Comoros, pindi msaada huo utahitajika baada ya kuripotiwa kwamba vikosi vya Serikali, vikisaidiwa na majeshi ya Umoja wa Afrika kutokea Sudan na Tanzania walishambulia kisiwa cha Anzuwani Ijumanne, na kumwondosha raisi muasi Mohamed Bacar.

Tawi la Ofisi ya UM juu ya Misaada ya Dharura (OCHA) nchini Sudan limetangaza taarifa inayohadharisha kwamba mashambulio dhidi ya wahudumia misaada ya kiutu katika jimbo la Darfur yamefikia kiwango kiliovuka mipaka na kisichostahamilika kamwe.

Kamati ya Kutathminia Amani Cote d’Ivoire imeidhinisha mapendekezo ya Mjumbe Maalumu wa KM kwa taifa hilo, Choi Young-Jin baada ya kufanyika mashauriano wiki hii na makundi husika katika mji mkuu wa Ouagadougou, Burkina Faso.

Shirika la Afya Duniani (WHO) limethibitisha wiki hii ya kuwa walimwengu wamejipatia ushindi mkuu, na wa kutia moyo, kwenye zile huduma za afya ya jamii kwa kudhibiti maradhi ya kupooza/polio katika Usomali.

Shirika la UM juu ya Miradi ya Chakula Duniani (WFP) limeripoti kusikitishwa na kushtushwa sana na ile taarifa iliyothibitisha madereva watatu walioajiriwa na UM Sudan kuhudumia misaada ya kiutu waliuawa hivi karibuni. Ijumamosi, dereva mmoja anayeitwa Mohamed Ali alipigwa risasi na kuuawa na washambuliaji wasiojulikana, na walimjeruhi vibaya msaidizi wake pale walipokuwa kwenye barabara inayoelekea Nyala, mji mkuu wa jimbo la Darfur Kusini.

Ofisi ya UM juu ya Huduma za Wahamiaji (UNHCR) imewanasihi wenye madaraka Ghana kujitahidi kusitisha haraka uhamisho wa nguvu kwa wahamiaji wa Liberia. Nasaha hii ilitangazwa baada ya Ghana kuamua Ijumapili kuwaondosha nchini wahamiaji 16 ambao walirejeshwa makwao kwa mabavu, kinyume na kanuni za kimataifa. Wingi wa wahamiaji hawa walikuwa wamesharajisiwa na UM wakisubiri kufarijiwa mahitaji yao ya kihali na UNHCR.

Shirika la UM juu ya Chakula na Kilimo (FAO) limeripoti kuwa wataalamu watafiti wamethibitisha hivi karibuni kwamba chanzo halisi cha homa ya mafua ya ndege (avian) ya aina ya H5N1 hakikutokana na kuku, kama ilivyodhaniwa katika siku za nyuma, bali maradhi haya yalisababishwa na wale mabata wanaochanganyika na watu kwenye mashamba ya mpunga, hususan katika mataifa ya Thailand na Viet Nam.