Habari Mpya

Alkhamisi, tarehe 21 Septemba iliadhimishwa na Umoja wa Mataifa (UM), kote duniani, kuwa ni Siku ya Amani ya Kimataifa. Katibu Mkuu Kofi Annan alijumuika kwenye Makao Mkuu mjini New York na watu mashuhuri kadha walioteuliwa na UM kuwa wajumbe wa kuendeleza mbele kampeni ya kuimarisha amani ulimwenguni, akiwemo pia Daktari Jane Goodall, kwenye tafrija za kuiadhimisha Siku hiyo. Daktari Goodall ni mtafiti wa wanyama pori na mtetezi wa hifadhi za mazingira, na ni mtu maarufu Afrika Mashariki ambapo alifanyia tafiti zake muhimu kadha wa kadha juu ya tabia za wanyama pori hususan masokwe.

Waziri wa Mambo ya Kigeni wa Uganda, Sam Kutesa aliwaarifu wajumbe wa kimataifa katika Baraza Kuu kwamba serekali yake, ikilazimika, ipo tayari kutoa msamaha kwa viongozi wa kundi la Lord\'s Resistance Army (LRA), kundi la waasi ambalo linajulikana kwa ukatili wa kuwatumia wanajeshi watoto wanaolazimishwa kuendeleza vitendo vya karaha dhidi ya utu, na pia kuendeleza unyanyasaji wa kijinisia dhidi ya wanawake wanaowateka nyara katika Uganda ya Kaskazini. jafanya askari mtoto ambalo limetuhumiwa, katika siku za nyuma, kuendeleza vitendo vya kikatli vilivyoharamisha haki za kiutu dhidi ya watoto na wanawake.

Mahakama ya UM juu ya Rwanda wiki hii iliamua, kwa kauli moja, kumwachia huru Andre Rwamakuba, aliyekuwa Waziri wa Elimu wa Rwanda aliyeshtakiwa kushiriki kwenye mauaji ya halaiki katika 1994. Mahakama iliripoti kuwa ilishindwa kupatiwa ushahidi wa kuridhisha ulioweza kuthibitsha kihakika kwamba Rwamakuba ana hatia.

Wanasayansi, wakuu wa mashirika ya kimataifa, wawakilishi wa kiserekali na pia wale kutoka mashirika yasio ya kiserekali waliohudhuria mkutano wa kihistoria juu ya UKIMWI mjini Toronto, Kanada katika mwezi Agosti walitoa mwito uliopendekeza ile mikakati ya kupambana na janga la virusi vya UKIMWI (VVU) na UKIMWI wenyewe ibadilishwe. A. Aboud kutoka Redio ya UM alihudhuria mkutano huo wa Toronto na alitayarisha ripoti maalumu juu ya pendekezo hilo. Kwa taarifa kamili sikiliza idhaa ya mtandao ya Umoja wa Mataifa.~

Mapema wiki hii Jan Egeland, Makamu KM Juu ya Misaada ya Kiutu ya Dharura alikutana na waandishi habari mjini Nairobi, Kenya baada ya kukhitimisha safari ya siku nane kwenye maeneo matatu yaliokabiliwa na matatizo ya kiutu barani Afrika; yaani Jamhuri ya Kidemokrasia ya Kongo (JKK), Uganda na Sudan ya Kusini.

KM wa UM Kofi Annan, mnamo mwanzo wa wiki, alishiriki kwenye mjadala maalumu wa Baraza la Usalama uliozingatia hali katika jimbola magharibi la Sudan la Darfur.

Ofisi ya Shirika la UM juu ya Huduma za Wahamiaji wa Dharura (UNHCR) imetangaza kuanzisha, wiki hii, misafara ya kuwarejesha makwao wakimbizi 400 wa Sudan ya Kusini ambao hivi sasa wanaishi katika eneo la kaskazini-mashariki ya JKK.

Mahakama ya UM juu ya Rwanda (ICTR) imetoa adhabu ya hukumu ya kifungo cha miaka 25 kwa Liuteni-Kanali Tharcisse Muvunyi, aliyekuwa kamanda wa zamani wa jeshi la Rwanda ambaye alipatikana na hatia ya kushiriki, katika miaka ya 1990s, kwenye mauaji ya halaiki na jinai dhidi ya raia.

Shirika la UM juu ya Ulinzi wa Amani katika JKK (MONUC) limeripoti ya kuwa wanamgambo 34 waliopo kwenye wilaya ya Ituri, kaskazini-mashariki ya JKK walisalimisha, kwa hiyari, silaha zao kwa vikosi vya kimataifa mnamo wiki iliopita.

Ofisi ya UM juu ya Misaada ya Kiutu (OCHA) imetuma timu ya maofisa wataalamu watatu katika Cote d’Ivoire kuisaidia serekali kudhibiti vyema tatizo liliozuka karibuni baada ya kugunduliwa taka za sumu ya kemikali zilizomwagwa mwezi uliopita katika mji mkuu wa Abidjan na kuhatarisha afya na usalama wa raia, kwa ujumla.~