Habari Mpya

Kamisheni ya UM juu ya Haki za Wanawake, au Kamisheni ya CSW ilifungua rasmi kikao cha mwaka, cha 52, mnamo Ijumatatu ya tarehe 25 Februari, kuzingatia masuala kadha kuhusu hadhi ya wanawake duniani, kufuatia mapendekezo yaliotolewa kwenye Mkutano wa Kimataifa wa Beijing juu ya Wanawake, pamoja na yale maazimio ya kikao maalumu cha 23 cha Baraza Kuu la UM juu ya usawa wa kijinsiya na maendeleo ya wanawake kwa karne ya ishirini na moja.

KM Ban Ki-moon Alkhamisi alitoa taarifa rasmi iliyoyapongeza “Maafikiano ya Ushirikiano wa Serikali ya Muungano” nchini Kenya, mapatano ambayo anaamini yatakapokamilishwa yatasaidia kuwasilisha suluhu ya kuridhisha kwa makundi yote yanayohusika na mzozo uliolivaa taifa lao katika wiki za karibuni.

Wiki hii Mjumbe Maalumu wa Katibu Mkuu kwa Usomali, Ahmedou Ould-Abdallah alifanya ziara ya siku tatu kwenye taifa hilo liliopo Pembe ya Afrika. Alipozuru Baidoa, palipo kikao cha Serikali ya Mpito, Ould-Abdallah alichukua fursa ya kuhutubia bunge.

Georges Omar Ruggu, mwandishi habari wa redio aliopatikana na hatia ya kuchochea mauaji ya halaiki dhidi ya raia wenye jadi ya KiTutsi nchini Rwanda katika 1994, na ambaye alihukumiwa kifungo cha miaka 12 na Mahakama ya UM juu ya Rwanda (ICTR) alihamishwa Alkhamisi kwa ndege ya kijeshi kutoka kizuizini Arusha, Tanzania na kupelekwa kifungoni Utaliana kumaliza adhabu yake.

Toby Lanzer, Mshauri wa Umoja wa Mataifa juu ya Misaada ya Dharura kwa Jamhuri ya Afrika ya Kati (CAR) kwenye mkutano na waandishi habari katika Makao Makuu ya UM alibainisha kwamba mashirika ya UM yanakabiliwa na tatizo gumu la kuhudumia misaada ya kiutu fungu kubwa la wahamiaji wa ndani ya nchi 200,000 waliokimbilia vichakani kaskazini katika Jamhuri ya Afrika ya Kati (CAR). Wahamiaji hawa huwa wanakimbilia vichakani kuwakwepa majambazi wenye silaha ambao hushambulia raia kihorera.

KM Ban Ki-moon ameyapongeza, kwa moyo thabiti, yale “Maafikiano ya Ushirikiano wa Serikali ya Muungano” kwa Kenya, yaliyotangazwa Alkhamisi mjini Nairobi ambapo juhudi za kusuluhisha kipamoja mzozo uliolivaa taifa baada ya matokeo ya uchaguzi, zimezalisha mafanikio ya kuridhisha.

Mashirika kumi ya Umoja wa Mataifa - yakijumuisha yale mashirika yanayoshughulikia huduma za kudhibiti UKIMWI (UNAIDS), kuimarisha miradi ya maendeleo (UNDP), maendeleo ya elimu, sayansi na utamaduni (UNESCO), Kamisheni ya Maendeleo ya Uchumi kwa Afrika (UNECA) na Mfuko wa Kudhibiti Idadi ya Watu Duniani, UNFPA; na vile vile yale yanayohusika na ulinzi wa haki za binadamu (OHCHR), huduma za wahamiaji (UNHCR), mfuko wa maendeleo ya watoto (UNICEF), mfuko wa maendeleo ya wanawake (UNIFEM) na pia afya ya kimataifa (WHO)- Ijumatano yametoa ripoti ya pamoja iliyoahidi kuchangisha kila juhudi ili kukomesha ile tabia haribifu ya kutahiri watoto wa kike, katika kipindi cha kizazi kimoja, pote duniani.

Yale malori manane ya Shirika la Ulinzi wa Amani Mipakani Ethiopia na Eritrea (UNMEE) yaliozuiliwa kwenye kituo cha ukaguzi na Vikosi vya Ulinzi vya Eritrea hayakufanikiwa kupakia vifaa vya uhamisho na yamerejea matupu mjini Asmara.

Duru ya nne ya mazungumzo juu ya kura ya maoni kwa Sahara ya Magharibi yanatazamiwa kufanyika katika mji wa Manhasset, New York kuanzia tarehe 16 hadi 18 Machi.

Askari wa Polisi kutoka Bangladesh wanaowakilisha Vikosi Mseto vya UM/UA kwa Darfur (UNAMID) vimeanzisha doria ya majaribio, za masafa marefu ya kilomita 200, zilizoanzia kwenye kambi zao katika mji wa Nyala, Darfur Kusini na kuendelea hadi mji mkuu wa Darfur Kaskazini wa El-Fasher.