Viongozi wa dini na siasa watetea ukeketaji Guinea- Ripoti

25 Aprili 2016

Ripoti mpya ya Umoja wa Mataifa iliyotolewa leo imesema ukeketaji wanawake na watoto wa kike nchini Guinea unazidi kuongezeka licha ya kuharamishwa kupitia sheria za kitaifa na kimataifa.

Takwimu zinaonyesha asilimia 97 ya wanawake na wasichana huko Guinea wenye umri kati ya miaka 15 hadi 49 wamekeketwa na kitendo hicho hufanyika wakiwa na umri wa chini ya miaka 10.

Akizungumzia ripoti hiyo kamishna Mkuu wa haki za binadamu Zeid Ra’ad Al Hussein amesema cha kusikitisha sheria zipo lakini kutokana na hofu ya kutengwa na jamii au kutoolewa, wasichana na wanawake wanasaka kukeketwa.

Halikadhalika hakuna utashi wa kisiasa kusimamia sheria ambapo hata viongozi wa kisiasa na kidini wanaunga mkono mila hiyo potofu.Ripoti imetaka serikali kusimamia sheria kwani hakuna misingi yoyote ya kuhalalisha mila hiyo potofu.

 

♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud na Twitter