Shirika la Umoja wa Mataifa la afya ulimwenguni, WHO limesema zaidi ya watu 550 katika nchi 30 wamethibitishwa kuambukizwa ugonjwa wa Monkeypox ambao huenezwa na virusi vinavyofanana na vile vya ugonjwa wa ndui.
Takriban siku 100 za vita nchini Ukraine zikikaribia, shirika la Umoja wa Mataifa la kuhudumia watoto UNICEF limesema athari kubwa za vita hivyo kwa watoto hazijawahi kushuhudiwa tangu vita ya pili ya dunia.
Kamishna Mkuu wa Umoja wa Mataifa wa Haki za Kibinadamu Michelle Bachelet akitoa maoni kuhusu kupitishwa kwa sheria ya kukomesha hukumu ya kifo nchini Jamhuri ya Afrika ya Kati, CAR amepongeza hatua hiyo na akasema anamuhimiza Rais Faustin-Archange Touadéra aitangaze.
Ripoti mpya kuhusu maendeleo ya nishati iliyotolewa leo na Umoja wa Mataifa imesema janga la COVID-19 limezorotesha mchakato wa kuelekea upatikanaji wa nishati kwa wote, huku vita inayoendelea nchini Ukraine huenda ikaudumaza zaidi mchakato huo.
Mratibu wa Misaada ya Kibinadamu katika Jamhuri ya Afrika ya Kati, CAR, Bi. Denise Brown, kupitia taarifa iliyotolewa leo na Ofisi ya Umoja wa Mataifa ya kuratibu masuala ya kibinadamu na misaada ya dharura, OCHA, amelaani vikali ongezeko la mashambulizi dhidi ya mashirika ya kibinadamu, ambayo katika baadhi ya matukio yamelazimisha mashirika kusimamisha shughuli zao kwa ajili ya usalama wa wafanyakazi wao.
Shirika la Umoja wa Mataifa la kuhudumia watoto UNICEF nchini Rwanda kwa kushirikiana na Bodi ya Madini nchini humo wamefanikiwa kuanzisha vituo viwili vya kulea watoto wadogo wenye umri kati ya miaka 0 mpaka 6 kwa ajili ya kusaidia wazazi wanaofanya kazi migodini waweze kuwa na uhakika wa sehemu wanapowaacha watoto pindi waendapo kujitafutia kipato.
