Bahari ni kubwa lakini ustahimili wake wa uchafuzi ni mdogo:

8 Juni 2015

Licha ya kwamba eneo la bahari duniani ni kubwa bado uwezo wake wa kustahimili uchafuzi utokanao na shughuli za binadamu ni mdogo, amesema Katibu Mkuu wa Umoja wa Mataifa Ban Ki-moon katika ujumbe wake wa siku ya bahari duniani hii leo.

Amesema bahari ni muhimu katika mustakhabali wa sayari ya dunia na hivyo matumizi endelevu ya rasilimali zake na kuepuka uchafuzi hasa unaotokana na shughuli za binadamu ni lazima vipatiwe ufumbuzi kwa ustawi wa kizazi cha sasa na vijavyo.

Umoja wa Mataifa unataja mabadiliko ya tabianchi kuwa kitisho kikubwa zaidi kwa ustawi wa bahari lakini David Osborn Mkurugenzi wa maabara za mazingira kwenye shirika la kimataifa la nishati ya atomiki, IAEA anasema kile ambacho binadamu anaweza kufanya ili kubadili mwelekeo.

(Sauti ya Osborne)

Wananchi wanaweza kutimiza wajibu wao kwa kuchukua hatua za kupunguza athari za mabadiliko ya tabianchi. Halikadhalika, wanaweza kuchukua hatua kupunguza uchafuzi. Fikiria wanavyotupa taka zao, mathalani plastiki. Kwa hiyo hii ni mifano ya mambo tunaweza kufanya. Tunaweza kuamua kula samaki waliovuliwa kiendelevu. Kwa hiyo tujielimishe ni aina gani wavuliwa kwa njia hiyo.”

Bwana Osborne amefafanua kuwa licha ya kwamba kuna bahari zinazotambuliwa kwa majina mbali mbali mathalani, Pasifiki na Hindi lakini bahari ni moja tu duniani na hivyo itambuliwe kwa umoja.

 

♦ Kupata takwimu za waathirika vitani Ukraine bofya  hapa.
♦ Iwapo ungependa kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud na Twitter