Habari kwa Ujumla

Msaidizi wa Katibu Mkuu wa Umoja wa Mataifa kuhusu haki za binadamu, Andrew Gilmour ameesema ukiukaji wa haki za binadamu huko Jamhuri ya Kidemokrasia ya Congo, DRC kwa mwaka jana uliongezeka kwa asilimia 30 ikilinganishwa na mwaka uliotangulia. Bwana Gilmour meyasema hayo kwenye kikao cha Baraza la Haki za Binadamu kinachoendelea huko Geneva, Uswis akiongeza kuwa ukiukwaji huo ni kuhusiana na kuzuia demokrasia na kuanza tena kwa shughuli za makundi kadhaa yenye silaha.

Msaidizi wa Katibu Mkuu wa Umoja wa Mataifa kuhusu haki za binadamu, Andrew Gilmour akizungumza kwenye kikao cha haki za binadamu katika mjadala kuhusu Guinea, amesema licha ya ahadi ya serikali baada ya kuwasilishwa kwa ripoti ya mwisho ya mashauriano ya kitaifa ya Juni 29 kuweka kipaumbele katika mapambano dhidi ya uonevu, bado kuna mapungufu makubwa katika kukabiliana na matukio mengi.

Muongozo mpya wa maadili kwa ajili ya kulinda haki za wagonjwa wa kifua kikuu au TB umezinduliwa leo Jumatano na shirika la afya ulimwenguni WHO , ukiwa na lengo la kusaidia kuhakikisha kwamba nchi zinatekeleza mkakati wa kutokomeza TB zikizingatia maadili ya kuwalinda wote walioathirika na maradhi hayo.

Ukosefu wa maji wilayani Pangani huko mkoani Tanga nchini Tanzania sio tu kwamba unahatarisha afya za wakazi wa wilaya hiyo, bali pia unasababisha mafarakano miongoni mwa wanajamii wanadoa na kuzorotesha maendeleo.

Maajabu Ally wa redio washirika Pangani Fm ya mkoani humo anaangazia adha hiyo inayokupa visa na mikasa ikiwamo kukesha kusubiri maji huku mama mmoja akisimulia namna mmewe alivyomwaga maji yake aliyoyateka . Kulikoni? Ungana naye.

Wakati tishio la baa la njaa likizidi kunyemelea Somalia, hali ya kibinadamu inaendelea kuzorota nchini humo, umesema Umoja wa mataifa Jumatano. Takribani watu 257,000 wametawanywa nchini Somalia tangu Novemba 2016 hadi Februari mwaka huu, huku wengine zaidi ya elfu nne wakivuka mpaka kuingia Ethiopia .

Ombi la msaada halijafikia hata nusu na gonjwa la kipindupindu na kuhara vikizidi kutishia maisha ya maelfu kama anavyofafanua msemaji wa Umoja wa Mataifa Farhan Haq akitoa taarifa kwa waandishi wa habari mjini New York

(Sauti ya Farhan)

Takriban watoto milioni 600 au 1 kati ya 4 kote duniani wataishi katika maeneo ambayo yana uhaba mkubwa wa maji ifikapo mwaka 2040 kwa mujibu wa ripoti ya shirika la Umoja wa Mataifa la kuhudumia watoto  UNICEF iliyotolewa Jumatano  katika siku ya maji duniani.

Ripoti hiyo ‘kiu kwa siku za usoni:maji na watoto katika mabadiliko ya tabia nchi” inaangalia vitisho kwa maisha ya watoto na mustakhbali wao vinavyosababishwa na kupungua kwa rasilimali ya maji na njia ambazo mabadiliko ya tabia nchi yanazidisha hatari hiyo katika miaka ijayo.

Katika kuadhimisha siku ya kimataifa ya ushairi, shirika la Umoja wa Mataifa la elimu, sayansi na utamaduni,  UNESCO limesema kwamba ushairi unalenga ubinadamu na maadili ya watu wote na kwamba kubadilisha shairi jepesi kuwa kichocheo thabiti kwa ajili ya kuibua majadiliano na kuleta amani.

Leo ni siku ya kimataifa ya ugonjwa unaoathiri uwezo wa kujifunza au down syndrome. Kauli mbiu mwaka huu ni “sauti yangu, jamii yangu” lengo likiwa kuwawezesha watu wenye ugonjwa huo kupaza sauti zao, kusikilizwa na kushawishi sera za serikali na hatua za kujumuishwa katika jamii.

Umoja wa Mataifa umesema kuwa kikosi cha kikanda cha ulinzi kitaanza kuwasili Sudan Kusini wiki chache zijazo, ikiwa ni utekelezaji wa azimio la Baraza la Usalama la umoja huo.

Mkuu wa operesheni za ulinzi wa amani kwenye Umoja wa Mataifa, Hervé Ladsous amesema hayo leo huko Juba, mji mkuu wa Sudan Kusini alikokuweko ziarani kwa siku mbili baada ya ziara kama hiyo nchini Mali.

Baraza la Usalama la Umoja wa Mataifa leo limejulishwa utekelezaji wa makubaliano ya kisiasa nchini Jamhuri ya Kidemokrasia ya Congo, DRC, bado umekwama, ikiwa ni miwili tangu yatiwe saini.

Hiyo ni kwa mujibu wa ripoti ya Katibu Mkuu wa Umoja wa Mataifa António Guterres, kuhusu DRC, ripoti iliyowasilishwa na mwakilishi wake maalum nchini DRC, Maman Sambo Sidikou.

(Sauti ya Maman)