Watoto Calais wamo hatarini:UNICEF

27 Oktoba 2016

Shirika la Kuhudumia Watoto, UNICEF limesema limesikitishwa mno na matukio ya jana usiku ambapo watoto wakimbizi wamelazimika kulala nje kwenye baridi baada ya kambi yao kuteketezwa moto huko Calais, Ufaransa. Halikadhalika, UNICEF imeshtushwa pia na habari zingine za watoto kutosajiliwa na kupewa vitambulisho na hivyo kurudishwa na polisi kambini.

Shirika hilo pia limesema, serikali ya Ufaransa na Uingereza ziliahidi kuwalinda watoto wakati kambi za Calais zikibomolewa, na iwapo hali hii itaendelea, basi itahatarisha usalama wao zaidi, na kurahisisha watoto kutumbukia kwenye mikono ya walanguzi na wasifirishaji haramu.

UNICEF inatoa wito kwa serikali hizo mbili kuhakikisha watoto wanalindwa wakati shughuli hizo za usajili zikiendelea.

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud