Wakimbizi wa Syria waanza kujirejesha nyumbani taratibu

13 Mei 2019

Nchini Syria baadhi ya wananchi waliokimbia makazi yao kutokana na vita vya wenyewe kwa wenyewe vilivyodumu kwa miaka nane sasa, wameanza kurejea kwenye mapagala yao ingawa kazi ya  ujenzi mpya inasalia kuwa na changamoto kubwa.

Miongoni mwa waliorejea kwenye mji wa Homs ni Jihad, ambaye kabla ya kuondoka nyumbani kwake Homs alikuwa anamiliki mamia ya njiwa lakini sasa wamesalia 40 tu.

Jihad amerejea mwaka mmoja uliopita, nyumba yake ni pagala, haina milango, madirisha wala mlango wa mbele, kulala kwao ni kwenye matandiko na hana chochote lakini bado wana nia ya kuishi hapa.

 “Hata kama hauna dari na unasimika hema ndani ya nyumba yako, ni bora hapa kuliko kuishi kwingineko.”

Ukosefu wa utulivu umeathiri pia elimu kwa watoto ambapo Abdelrahman, mtoto wa Jihad hajaenda shule kwa miaka mitatu sasa akisema kila ahamiapo akianza kusoma tu mwezi mmoja, wanahama kutokana na ghasia lakini sasa wamerejea nyumbani.

UNICEF/Penttila
Uharibifu katika mji wa Homs, Mashariki mwa Syria. Syria ni nchi isiyo na amani zaidi duniani

Hivi sasa Jihad na familia yake wanatarajia kukarabati nyumba yao ambapo shirika moja la kiraia limewawekea milango na madirisha kiasi cha kuwezesha njiwa kurejea.

“Katu sitokubali kuuza nyumba yangu ili kupata dunia nzima.”

Hadi mwezi Disemba mwaka jana wakimbizi wa ndani milioni 1.4 nchini Syria wamerejea nyumbani kwa mipango yao wenyewe pamoja na wale walioko ugenini kutokana na machafuko kupungua kwenye maeneo yao.

Shirika la Umoja wa Mataifa la kuhudumia wakimbizi, UNHCR limesema linatarajia idadi ya wakimbizi wanaorejea wenyewe kuongezeka mwaka 2019 na linaendelea kusaidia mahitaji ya wakimbizi wa ndani na wale wanaorejea.

Katika miaka nane ya vita vya Syria, zaidi ya raia milioni 6.2 wamekuwa wakimbizi wa  ndani.

 

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud

Fuatilia Habari: Habari zilizopita za Mada Hii

Twashindia kunde kwa supu, hali ni tete- Mkimbizi

Nchini Lebanon, wakimbizi wa Syria wanahaha kila uchao kuweza kukimu maisha yao ambapo hali ni ngumu zaidi kwa makundi yasiyojiweza ikiwemo wazee. 

Khaled, mtoto wa kiume mwenye umri wa miaka 10, anaeleza Bwana Lowcock kuhusu jinsi anavyofurahia kwenda shule. Alipoteza makazi na familia yake mwaka mmoja uliopita huko Palmyra. Picha: OCHA

Hali Syria ni tamu na chungu- OCHA

Ziara yangu nchini Syria ni sawa na tamu na chungu kutokana na kile ninachoshuhudia, amesema mkuu wa ofisi ya Umoja wa Mataifa inayohusika na usaidizi wa dharura, OCHA, Mark Lowcock.