Umoja wa Mataifa unaendelea kukabiliwa na mikingamo kufikisha misaada Gaza

Misafara ya chakula inayoratibiwa na Umoja wa Mataifa ina uwezekano mara tatu zaidi wa kunyimwa kufika Gaza kaskazini kuliko misafara mingine ya misaada, imesema ofisi ya Umoja wa Mataifa ya kuratibu misaada ya kibinadamu, OCHA hii leo.

Mamlaka za Israel hazijatoa sababu wazi kwa nini, alisema.

Msemaji wa OCHA Jens Laerke, akizungumza na waandishi wa habari huko Geneva nchini Uswisi amesema mamlaka za Israel hazijatoa sababu ya wazi kwanini misafara ya Umoja wa Mataifa inakumbwa na mikingamo hiyo. "Mara nyingi wanakataa na ndivyo hivyo, na inaishia hapo. Hatupati maelezo,” alisema.

Katika simu iliyoripotiwa na watu wengi Alhamisi iliyopita kati ya Rais wa Marekani Joe Biden na Waziri Mkuu wa Israel Benjamin Netanyahu, Israel iliazimia kufungua tena kivuko cha mpaka cha Erez kuelekea kaskazini mwa Gaza pamoja na kurahisisha utoaji wa misaada kupitia bandari iliyo karibu ya Ashdod.

Ikulu ya Marekani ilisema itafuatilia kwa karibu lakini hakuna tarehe iliyowekwa na Israel kuchukua hatua na makubaliano ya kupanua njia za kuingia Gaza bado hayajatimia.

Bw. Laerke aliulizwa kuhusu kufunguliwa kwa njia zaidi za misaada, hasa kivuko cha Erez, lakini alisema kufikia Jumatatu usiku, OCHA ilikuwa haijapata taarifa yoyote kwamba imefungua.

Kukanusha na vikwazo

OCHA ilitoa ripoti wiki hii ambayo ilisema kwamba vikwazo na kukataliwa kwa harakati za misaada zilizopangwa na mamlaka ya Israeli kunaendelea kutatiza utoaji wa msaada wa kuokoa maisha katika eneo lililoshambuliwa.

Mwezi Machi, zaidi ya nusu ya misheni za misaada ya chakula iliyoratibiwa na Umoja wa Mataifa katika maeneo hatarishi yanayohitaji uratibu na mamlaka ya Israel ama ilikataliwa au kuzuiwa.

Bwana Laerke alikuwa akijibu maswali ya waandishi wa habari kuhusu idadi ya lori za misaada zinazoingia Gaza na tofauti kati ya takwimu za Israel na Umoja wa Mataifa.

Alisema Uratibu wa Shughuli za Serikali ya Israel katika Wilaya (COGAT) huhesabu malori ambayo inakagua na kutuma kuvuka mpaka huku OCHA ikihesabu lori zinazofika kwenye maghala yake.

Malori yaliyokaguliwa na COGAT kawaida huwa nusu tu, kulingana na mahitaji yake, alisema.

"Tunapohesabu lori za upande mwingine wakati zimepakiwa tena ... zimejaa. Tayari hapo, nambari hazitalingana kamwe,” aliendelea.

Alifafanua kuwa kuhesabu siku hadi siku na kulinganisha nambari "hakuleti maana kidogo" kwani haizingatii ucheleweshaji wa kuvuka na kuhamia kwenye maghala.

Vikwazo vilivyowekwa na Israel pia vinakataza madereva na malori ya Misri kuwa katika eneo moja kwa wakati mmoja na madereva na malori ya Wapalestina, kwa hivyo makabidhiano sio rahisi.

Ufikiaji wa kaskazini mwa Gaza

Bwana Laerke alisisitiza kuwa kupeleka misaada ndani ya Gaza "ni tatizo jingine", akimaanisha vikwazo na kunyimwa ufikiaji.

"Misafara ya chakula ambayo inapaswa kwenda hasa kaskazini, ambako asilimia 70 ya watu wanakabiliwa na hali ya njaa, ina uwezekano mkubwa, mara tatu zaidi, kukataliwa kuliko msafara mwingine wowote wa kibinadamu wenye nyenzo za aina nyingine," alisema.

Aliwaambia waandishi wa habari kwamba usambazaji wa misaada ndani ya Gaza "ni suala kubwa" kutokana na sababu za ulinzi na usalama, na kuvunjika kwa sheria na utulivu.

"Lakini pia tunasisitiza kwamba wajibu kwa pande zinazopigana - na, hasa, ningesema juu ya Israel kama mamlaka inayoikalia kwa mabavu Gaza - kuwezesha na kuhakikisha ufikiaji wa kibinadamu hauishii mpakani," alisema.