Mjadala wa wazi wa ngazi ya mawaziri kuhusu mabadiliko ya tabianchi na usalama, viongozi watoa maoni
Tabianchi na mazingira
Viongozi wa ngazi mbalimbali kutoka nchi wanachama wa Umoja wa Mataifa hii leo wametumia mjadala wa wazi wa ngazi ya mawaziri kuhusu tabianchi na usalama uliofanyika katika makao makuu ya Umoja wa Mataifa jijini New York, kutoa maoni yao na wasiwasi walionao kuhusu mabadiliko ya tabianchi.
Msaidizi wa Katibu Mkuu na mkuu wa Operesheni za ulinzi wa Amani , Jean-Pierre Lacroix, amesema, "Tayari tunaona uwiano mkubwa kati ya Nchi Wanachama zinazokabiliwa na udhaifu na zile zinazokabiliwa na mabadiliko ya tabianchi. Kati ya nchi 16 ambazo ziko hatarini zaidi kwa tabianchi, tisa kati yao ni mwenyeji wa Operesheni za Umoja wa Mataifa, nazo ni Jamhuri ya Afrika ya Kati, Jamhuri ya Kidemokrasia ya Congo, Sudan, Sudan Kusini, Afghanistan, Somalia, Mali, Haiti na Yemen.
Akitoa taarifa kwa Baraza la Usalama leo (13 Juni) mjini New York, wakati wa mjadala wa wazi wa ngazi ya mawaziri kuhusu mabadiliko ya tabianchi, amani na usalama, Jean-Pierre Lacroix, amesema, "Ni muhimu pia kumbuka kuwa oparesheni nyingi za amani za Umoja wa Mataifa zimewekwa katika mazingira ambayo yameathiriwa sana na tabianchi na yenye viwango vya juu vya ukosefu wa usawa wa kijinsia.
Kwa mujibu wa Jean-Pierre Lacroix, "Wahandisi wa kijeshi nchini Sudan Kusini wameelekezwa kushughulika na mafuriko na ujenzi wa mitaro kwa wakati wote ili waweze kulinda miundombinu muhimu kama vile kambi za Wakimbizi wa Ndani, vituo vya UNMISS, barabara kuu na uwanja wa ndege."
"Nchini Somalia," amesema, "miaka ya migogoro imeharibu ustahimilivu wa Serikali na jamii."
Amefafanua, "Ukame wa sasa, mbaya zaidi katika miongo minne, unaongezea katika udhaifu na kuchangia kuhama, njaa na malalamiko."
Lacroix ameendelea kusema, “Nchini Iraq, uhaba wa maji, halijoto inayoongezeka, na dhoruba za vumbi inaweka shinikizo kubwa kwa mahusiano kati ya jamii.”
Mkuu wa idara ya Operesheni za Amani amehitimisha akisema, "Katika maeneo haya na mengine mengi, athari za mabadiliko ya tabianchi zinaunda upya vigezo vya kazi yetu ya kuzuia migogoro, kuleta amani, kujenga amani na kulinda amani."
Juan Manuel Santos, Rais wa zamani wa Colombia na Mshindi wa Tuzo ya Amani ya Nobel akihutubia Baraza la Usalama Mkutano wa baraza kuhusu vitisho kwa amani na usalama wa kimataifa athari za mabadiliko ya tabianchi..
Rais wa zamani wa Colombia
Pia akihutubia Baraza, Juan Manuel Santos, Rais wa zamani wa Colombia na Mshindi wa Tuzo ya Amani ya Nobel, amesema, "Tuko katika wakati katika historia ambapo ulimwengu uko katika hatari ya kugawanyika katika kambi zinazoshindania madaraka na ukuu juu ya kila mmoja, badala ya kushirikiana kushughulikia changamoto ambazo hazijawahi kushuhudiwa na matishio yaliyopo ambayo sote tunakabiliwa nayo."
Amesisitiza, "Unganeni, shirikiana, la sivyo sote tutaangamia."
Salma Kadry, Mtaalamu wa Tabianchi, Amani na Usalama anayewakilisha Muungano wa Kimataifa wa Utafiti wa Kilimo wa Kimataifa (CGIAR), amebainisha, "Kuna haja ya zana zilizorahisishwa za ufadhili wa tabianchi ambazo zimeundwa kwa ajili ya nchi zenye migogoro - kufikia zile zinazohitaji zaidi."
Hermann Immongault, Waziri wa Mambo ya Nje wa Gabon, amesema, "Mjadala huu juu ya mabadiliko ya tabianchi katika Baraza la Usalama kwa mara nyingine unaangazia umuhimu muhimu wa kuzingatia uhusiano wa usalama wa tabianchi, pamoja na hitaji la kuchukua hatua mbele ya athari kwa amani ya kimataifa na usalama.”
John Kerry
Mjumbe Maalumu wa Rais wa Marekani kuhusu Tabianchi, John Kerry yeye amesema, “Hakuna nafasi ya mjadala juu ya sayansi hapa. Janga linaongezeka. Linadhoofisha amani na usalama wetu wa pamoja, na bila hatua za pamoja kutoka kwa chombo hiki na kila taasisi ya serikali inayoshughulikia hili, bila juhudi hizo athari za ulimwengu zitazidi kuwa mbaya. Na itaendelea kutishia amani yetu, maisha yetu, usalama wetu, kwa mtindo zaidi, kila siku, kila mwaka ambayo hatufanyi tunajua tunahitaji kufanya.”
Kwa upande wake, Livia Leu, wa Uswizi, amesema, "Usalama wa tabianchi ni moja ya msingi wa utulivu. Lazima tuzingatie hatua za tabianchi sio tu katika Ajenda ya 2030, lakini pia katika ajenda mpya ya amani."
Falme za kiarabu
Akizungumza na waandishi wa habari kabla ya mkutano huo, Waziri wa Mabadiliko ya Tabianchi na Mazingira wa Umoja wa Falme za Kiarabu (UAE) Mariam bint Mohammed Saeed Hareb Almheiri akishirikiana na wawakilishi wa Gabon, Malta, Msumbiji, Uswisi, Albania na Ghana, amesema wanafahamu kuwa mfumo wa kimataifa haujakabiliwa na changamoto tata kama mabadiliko ya tabianchi katika historia yake. “Hakuna serikali moja au shirika la kimataifa linaweza kukabiliana na changamoto ya mabadiliko ya tabianchi peke yake”.