UN yalaani ghasia dhidi ya wageni Afrika Kusini

3 Septemba 2019

Katibu Mkuu wa Umoja wa Mataifa Antonio Guterres amelaani vitendo vya ghasia dhidi ya wageni nchini Afrika Kusini vinavyoenda sambamba na mashumbulizi dhidi ya raia wa kigeni pamoja na uharibifu wa mali.

Taarifa iliyotolewa hii leo jijini New York, Marekani na msemaji wa Umoja wa Mataifa, imemnukuu Katibu Mkuu akitambua kauli ya Rais Cyril Ramaphosa ya kulaani vikali vitendo hivyo na wito wake wa kutaka kuimarisha uwajibikaji kwa mujibu wa maadili ya Afrika Kusini yaliyoainishwa kwenye katiba.

Bwana Guterres ametoa wito kwa viongozi wote wa kisiasa kulaani na kukataa wazi wazi matumizi ya ghasia.

Vyombo vya habari vinaripoti ya kwamba ghasia hizo zinazozidi kushamiri kila uchao zimeshika kasi zaidi kwenye miji ya Pretoria na Johannesburg ambapo watu wapatao watano wameripotiwa kuuawa ilihali makumi kadhaa wanashikiliwa na polisi kwa tuhuma za kuhusika na fujo hizo.

 

 

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud