UNICEF yaomba ufadhili wa dharura wa dola za Marekani bilioni 10.3 kuokoa watoto

Shirika la Umoja wa Mataifa la kuhudumia watoto, UNICEF, leo limezindua ombi la ufadhili wa dharura wa dola za Marekani bilioni 10.3 ili kufikia zaidi ya watu milioni 173 - ikiwa ni pamoja na watoto milioni 110 walioathiriwa na majanga ya kibinadamu, athari za kudumu za janga la COVID-19 ulimwenguni kote na tishio linaloongezeka la hali mbaya ya hewa iliyoathiriwa na tabianchi, imeeleza taarifa ya shirika hilo iliyotolewa leo Desemba, 5, 2022 jijini Geneva, Uswisi.

"Leo, kuna watoto wengi wanaohitaji msaada wa kibinadamu kuliko wakati mwingine wowote katika historia ya hivi karibuni," Mkurugenzi Mtendaji wa UNICEF Catherine Russell amesema na kuongeza kuwa, "duniani kote, watoto wanakabiliwa na mchanganyiko mbaya wa migogoro, kutoka kwa migogoro na kuhamishwa hadi milipuko ya magonjwa na kuongezeka kwa viwango vya utapiamlo. Wakati huo huo, mabadiliko ya tabianchi yanafanya majanga haya kuwa mabaya zaidi na kuibua mapya. Ni muhimu kwamba tuwe na usaidizi ufaao ili kufikia watoto kwa hatua madhubuti na za kibinadamu kwa wakati." 

Mwaka huu ulianza huku takriban watu milioni 274 wakihitaji msaada wa kibinadamu na ulinzi. Kwa mwaka mzima, mahitaji haya yalikua kwa kiasi kikubwa, kwa kiasi kikubwa kutokana na migogoro, ikiwa ni pamoja na vita ya Ukraine; kuongezeka kwa ukosefu wa chakula; kwa vitisho vya njaa vinavyoletwa na tabianchi na mambo mengine; na mafuriko makubwa nchini Pakistan. Ulimwenguni kote, kuibuka tena kwa milipuko ya magonjwa ikiwa ni pamoja na kipindupindu na surua huleta hatari zaidi kwa watoto katika dharura. 

Athari zinazoendelea za janga la COVID-19, na msukosuko wa uchumi wa dunia na kuyumba, ikiwa ni pamoja na mfumuko wa bei na kupanda kwa gharama ya chakula na mafuta, kumekuwa na athari mbaya kwa maisha na ustawi wa mamilioni ya watoto walio hatarini zaidi ulimwenguni. 

UNICEF Egypt

Watoto wakishiriki katika hafla ya mabadiliko ya tabianchi.

UNICEF inaendelea kueleza kuwa mabadiliko ya tabianchi pia yanazidisha kiwango na ukubwa wa dharura, “miaka 10 iliyopita ndio ilikuwa ya joto zaidi katika rekodi na idadi ya majanga yanayohusiana na tabianchi imeongezeka mara tatu katika miaka 30 iliyopita. Leo, zaidi ya watoto milioni 400 wanaishi katika maeneo yenye mazingira magumu sana au yenye maji mengi.” 

Wakati huo huo, watoto wanavuka mipaka kwa idadi za juu , na familia zao au kutengwa nao, au bila kuandamana. Kwa ujumla, takribani watoto milioni 37 duniani kote wamelazimika kuyahama makazi yao kutokana na machafuko, “kiwango cha watoto waliokimbia makazi ambacho hakijaonekana tangu Vita ya Pili vya Dunia.” 

Kama sehemu ya Hatua za Misaada ya Kibinadamu kwa Watoto, ambayo inaifanya UNICEF kutoa  ombi hilo kwa ajili ya mwaka 2023, UNICEF inapanga kufikia: 

Watoto milioni 8.2 wanaopata matibabu ya utapiamlo mkali. 

Watoto milioni 28 chanjo ya surua. 

Watu milioni 63.7 maji salama kwa ajili ya kunywa na mahitaji ya nyumbani. 

Afya ya akili na usaidizi wa kisaikolojia na kijamii kwa Watoto milioni 23.5, vijana barubaru, na walezi. 

Watoto na wanawake milioni 16.2 wanaoweza kupata afua za kupunguza hatari za unyanyasaji wa kijinsia, kuzuia na/au kukabiliana na hali hiyo. 

Njia salama na zinazoweza kufikiwa za kuripoti unyanyasaji na unyanyasaji wa kingono unaofanywa na wafanyakazi wanaotoa usaidizi kwa watu walioathirika kwa watu milioni 32. 

Elimu rasmi au isiyo rasmi, ikiwa ni pamoja na kujifunza mapema kwa watoto milioni 25.7 

Kwa mujibu wa UNICEF, nchi 5 zenye uhitaji zaidi wa ufadhili katika mwaka 2023 ni:

Afghanistan (Dola bilioni 1.65) Ukraine na msaada kwa wakimbizi (Dola bilioni 1.058) Janga la wakimbizi wa Syria (Dola milinoni 867)  Jamhuri ya Kidemokrsaia ya Congo, DRC, (Dola milioni 862) na Ethiopia (Dola milioni 674).