Mvua Somalia kutumbukiza watoto kwenye unyafuzi-UNICEF
Msaada wa Kibinadamu
Mafuriko yanatokana na mvua zinazonyesha nchini Somalia, siyo tu yanasababisha maelfu ya watu kukimbia makazi yao bali yanatishia mustakbali wa kiafya wa watoto.
Msemaji wa shirika linalowahudumia watoto la Umoja wa Mataifa, UNICEF, Christopher Boulierac amesema hayo leo mbele ya waandishi habari mjini Geneva Uswisi.
Bwana Boulierac amesema nusu ya watu wapatao 230,000 waliopoteza makazi yao tangu kuanza kwa mafuriko mwezi Aprili mwaka huu ni watoto.
Mvua haziwezi kukomesha mgogoro wa utapia mlo kwa watoto nchini Somalia.
Ameonya kuwa nusu ya watoto hao wenye umri wa chini ya miaka mitano, ambao idadi yao ni takriban milioni 1.25 wanaweza kupata utapiamlo uliokithiri, ujulikanao pia kama unyafuzi.
Msemaji huyo wa UNICEF amesema kuwa mwaka huu pekee shirika lake limewatibu watoto zaidi ya 88,000 ambao walikuwa wakikabiliwa na unyafuzi.
Anasema mvua husambaza magonjwa ambayo ni hatari kwa watoto wenye utapiamlo kwani mfumo wao wa kinga ya kimwili huwa imedhoofika.
Wakimbizi wa ndani wakimbilia Mogadishu Somalia wakitafuta msaada wa chakula na maji kufuatia ukame uliokithiri vijijini nchini humo.
Ametaja magonjwa kama vile kuhara na kipindipindu ndio yanahofiwa kutokea.
UNICEF inaomba ufadhili zaidi iweze kuendelea kuhudumia watoto ambapo Bwana Boulierac amesema mwaka huu wamepokea dola milioni 24.3 tu kati ya dola milioni154.9 ilizoomba.
Pengo hilo ni sawa na asilimia 71.