WFP yachukua hatua kukabili njaa huko Kasai, DRC
Msaada wa Kibinadamu
Ghasia zikishamiri huko jimbo la Kasai nchini Jamhuri ya Kidemokrasia ya Congo, DRC na ufikishaji misaada nao ukigonga mwamba, shirika la mpango wa chakula duniani, WFP limeibuka na mbinu mpya za kukabili njaa.
WFP inasema imeamua kupatia kipaumbele mikakati miwili ya operesheni zake za dharura huko Kasai.
Hatua hizo ni mgao wa fedha na usaidizi wa kitaalamu kwa wanawake na watoto ili kuepusha utapiamlo uliokithiri.
Mathalani mpango wa utoaji fedha ulianza wiki iliyopita ambapo wanufaika wanapatiwa dola 15 kila mmoja kwa mwezi ili kununua atakacho kwenye eneo lao.
Hadi sasa watu 38,000 wamenufaika na mpango ni kuongeza maradufu idadi hiyo katika wiki chache zijazo.
Kwa upande wa lishe, WFO imepatia watoto 56, 000 vyakule vyenye virutubisho ikiwa ni ongezeko kutoka watoto 21,000 waliopatiwa huduma hizo miezi mitatu ya mwisho ya mwaka jana.
Mwakilishi wa WFP nchini DRC Claude Jibidar amesema mpango wa lishe na fedha unaokoa maisha haraka akisema hata hivyo bado hawajaweza kutoa usaidizi wanaotaka kutokana na ukata na vikwazo vya kiusalama.
Tathmini inaonyesha kuwa watu milioni 3.2 wengi wao wakiwa ni wakulima wanakabiliwa na uhaba wa chakula huko Kasai.