Wakimbizi kutoka Yemen wanufaika na mafunzo ya stadi za maisha Ethiopia

30 Oktoba 2019

Nchini Ethiopia, mradi wa mafunzo ya ufundi kwa vijana umepatia wakimbizi na wenyeji fursa ya pamoja ya kujifunza, kuchangia katika uchumi wa nchi na pia kuondokana na utegemezi. 

Addis Ababa, mji mkuu wa Ethiopia, wanafunzi wakiwa darasani. Hawa ni wakimbizi na wenyeji wakijifunza masomo na stadi kadhaa za kazi ikiwemo mapishi, ufundi seremala na ufundi mchundo.

Mradi huu katika chuo hiki cha ufundi cha Nefas Silk unafadhiliwa na shirika la maendeleo la Ujerumani na miongoni mwa wanafunzi ni Hanan Seif Hassan, mkimbizi kutoka Yemen ambaye awali kutokana na umri wake wa miaka 32 alikuwa na hofu kuwa atasomaje utu uzimani.

Hannan anasema kwamba,  “niliona aibu kurejea shule baada ya miaka yote hii lakini nilipoona vile wengine wanajifunza, nikahamasika na kuingia.”

Kadri siku zilivyosonga Hannan alijenga urafiki na Yanchinew Gebeyu, raia wa Ethiopia na shaka na shuku zilitoweka zaidi kama asemavyo Yanchinew ya kwamba,  “watu wanatoka mataifa tofauti na ilikuwa vigumu kuelewana lakini nilifahamu kuwa mambo yatakuwa mazuri baada ya muda.”

Kila asubuhi, Hanan na marafiki zake wanakata vitunguu, wanamenya karoti, wanachemsha kunde, wanapika wali na kuandaa sambusa ambazo huuza.

Akizungumzia wanavyotengeneza, Hannan anasema kwamba, “tunajaza ndani nyama kunde, matunda, tende na hata jibini. Tunaja chochote ndani kama inavyotakiwa, kile ambacho watu wanapenda.”

Mradi huu unasaidia wakimbizi na wenyeji kuibuka na miradi ambapo baada ya miezi 6 ya mafunzo Hannan na Yanchinew waliibuka na mpango wa kibiashara na kuingiza sambusa zao sokoni ambapo kila siku wanaweza kuuza sambusa 200.

Kwa Hannan, Ethiopia imempatia fursa mpya ambazo katu asingaliweza kuzipata nyumbani Yemen na urafiki wake na Yanchiew unakua kila uchao.

Ethiopia inaongoza barani Afrika kwa kuwa na idadi kubwa ya wakimbizi na mwezi Januari mwaka huu ilipitisha sheria mpya ambayo inawapatia wakimbizi fursa adimu ikiwemo kusajili vizazi, ndoa, vifo na hata kupata ajira na huduma za benki na elimu,

Audio Credit:
Arnold Kayanda/Assumpta Massoi
Audio Duration:
2'3"

 

♦ Tafadhali iwapo unataka kupokea taarifa kutoka UN News Kiswahili kila wakati zinapochapishwa jisajili  hapa.
♦ Pia unaweza kupakua apu ili kusikiliza matangazo yetu wakati wowote popote ulipo.
♦ Tembelea pia chaneli yetu ya Youtube na pia Soundcloud