انسانیت کا شاندار تنوع اثاثہ ہے خطرہ نہیں: انتونیو گوتیرش
اقوام متحدہ کے سیکرٹری جنرل انتونیو گوتیرش نے کہا ہے کہ انسانیت کا تنوع نقصان دہ نہیں بلکہ فائدے کی چیز ہے اور تمام ممالک مزید پُرامن مستقبل کے لیے مشترکہ انسانیت کے جذبے کے تحت متحد ہو کر آگے بڑھیں۔
دو اکتوبر کو عدم تشدد کے عالمی دن پر اپنے پیغام میں ان کا کہنا ہے کہ پس منظر، مالی وسماجی حیثیت یا عقیدے سے قطع نظر ہر فرد کے لیے وقار، مواقع اور حقوق پر مبنی زندگی یقینی بنانے کی ضرورت ہے اور اس مقصد کے لیے سماجی ہم آہنگی کو مضبوط بنانا ہو گا اور سمجھوتے کی ہمت پیدا کرنا ہو گی۔
عدم تشدد کا عالمی دن انڈیا کی تحریک آزادی کے رہنما اور عدم تشدد کے فلسفے کے بانی مہاتما گاندھی کے یوم پیدائش کے موقع پر منایا جاتا ہے۔
گاندھی کا پیغام
انتونیو گوتیرش نے کہا کہ "ہم اس دن پر گاندھی کا یوم پیدائش مناتے ہوئے باہمی احترام اور مفاہمت، انصاف اور پُرامن اقدام کی طاقت جیسی دائمی اقدار پر بھی غور کرتے ہیں جن کے لیے انہوں نے کام کیا۔"
ان کا کہنا ہے کہ گاندھی کی پیروی کرتے ہوئے ہمیں انسانی تنوع کو اپنی طاقت بنانا ہو گی اور اسی طرح ہم انسانیت کو درپیش تمام مسائل پر قابو پا کر روشن تر اور پُرامن مستقبل کی راہ تشکیل دے سکتے ہیں۔
سیکرٹری جنرل نے کہا کہ ہمیں گاندھی کی اس دانشمندانہ صلاح کو یاد رکھنا ہے کہ 'متنوع حیثیت میں متحد ہونے کی ہماری اہلیت ہماری تہذیب کی خوبصورتی اور اس کا امتحان ہو گی۔' آئیے آج ان کے الفاظ پر دھیان دیں اور اس لازمی مقصد کے لیے اپنے عہد کی تجدید کریں۔
عدم تشدد کا عالمی دن
اس عالمی دن کا آغاز اقوام متحدہ کی جنرل اسمبلی نے کیا تھا اور اس موقع پر تعلیمی اور عوامی آگاہی کی متعدد مہمات کے ذریعے عدم تشدد کے پیغام کو فروغ جاتا ہے۔
جنرل اسمبلی نے عدم تشدد کے اصول کی عالمگیر اہمیت اور امن، رواداری و عدم تشدد کا ماحول تشکیل دینے کی خواہش کی بھی توثیق کی ہے۔