یو این چیف کی جمہوریہ وسطی افریقہ میں امن سپاہی کی ہلاکت کی مذمت
امن اور سلامتی
اقوام متحدہ کے سیکرٹری جنرل انتونیو گوتیرش نے وسطی جمہوریہ افریقہ میں امن و امان کی صورت حال کو مستحکم بنانے کے مشن (مینوسکا) میں خدمات انجام دینے والے کیمرون کے اہلکار کی ہلاکت پر افسوس کا اظہار کرتے ہوئے اس واقعے کی مذمت کی ہے۔
یہ واقعہ شمالی صوبے پاؤا کے علاقے بنڈالی میں اس وقت پیش آیا جب امن اہلکاروں (بلیو ہیلمٹس) کی گاڑی دھماکہ خیز مواد سے ٹکرا گئی۔ اس حملے میں پانچ اہلکار زخمی بھی ہوئے۔
اقوام متحدہ کے ترجمان سٹیفن ڈوجیرک کے مطابق سیکرٹری جنرل انتونیو گوتیرش نے ہلاک ہونے والے اہلکار کے خاندان اور کیمرون کی حکومت سے دلی تعزیت کا اظہار کرتے ہوئے زخمیوں کی فوری صحت یابی کی خواہش کی ہے۔
'مینوسکا' کی سربراہ ویلنٹینا روگوابیزا نے بھی سوشل میڈیا کے پلیٹ فارم ایکس پر اپنے بیان میں اس حملے کی سختی سے مذمت کی ہے۔ ان کا کہنا ہے کہ ایسا دھماکہ خیز مواد شہریوں کے تحفظ، امن و امان کے خراب حالات کا سامنا کرنے والے علاقوں میں انسانی امداد کی فراہمی اور لوگوں کی سرگرمیوں کو لاحق مہلک ترین خطرات میں سے ایک ہے۔
ممکنہ جنگی جرم
اقوام متحدہ کے سیکرٹری جنرل نے یاد دلایا ہےکہ ادارے کے امن اہلکاروں کے خلاف ایسے حملے بین الاقوامی قانون کے تحت جنگی جرائم کے مترادف ہو سکتے ہیں۔
انہوں نے وسطی جمہوریہ افریقہ کے حکام سے کہا ہے کہ وہ اس حملے کے ذمہ داروں کی نشاندہی اور فوری انصاف یقینی بنانے کے لیے کوئی کسر اٹھا نہ رکھیں۔
سیکرٹری جنرل نے ملک کے لوگوں اور حکومت کے ساتھ اقوام متحدہ کی یکجہتی کا اعادہ بھی کیا ہے۔