MONUSCO na miradi ya ulinzi na uwezeshaji raia DR Congo

Semina iliyofanyika huko Mangina jimbo la Kivu Kaskazini nchini DRC kuhamasisha dhidi ya vitendo vya ukatili wa kingono vifanywavyo na watendaji au mawakala wa Umoja wa Mataifa.

Hapa ni Mangina jimboni Kivu Kaskazini ambapo kitengo cha tabia na nidhamu cha ujumbe wa Umoja wa Mataifa nchini Jamhuri ya Kidemokrasia ya Congo, DRC kimeendesha semina  kwa wanafunzi 543 wakiwemo wasichana 263 kutoka taasisi ya AHADI. Semina hii imewahamasisha kuhusu harakati dhidi ya ukatili na  unyanyasaji wa kingono unaofanywa na watendaji wa Umoja wa Mataifa na mawakala ikiwa ni utekelezaji wa ajenda ya Umoja wa Mataifa ya kutovumilia kabisa vitendo hivyo vifanywavyo na watendaji wake.

MONUSCO / CDT-Beni
Kitengo cha tabia na nidhamu cha MONUSCO kinasaidia manusura wa ukatili na unyanyasaji wa kingono eneo la Sake jimboni Kivu Kaskazini nchini Jamhuri ya Kidemokrasia ya Congo, DRC.

Pichani ni wanawake manusura wa ukatili na unyanyasaji wa kingono kwenye eneo la Sake jimboni Kivu Kaskazini, wakionyesha uyoga ambao wamevuna ikiwa ni mradi uliosimamiwa na kitengo cha tabia na nidhamu cha  Ujumbe wa Umoja wa Mataifa nchini  Jamhuri ya Kidemokrasia ya Congo, DRC. Mradi huu unasaidia wanawake hawa kuongeza kipato na ni moja ya miradi kama vile ushonaji na uoakaji mikate inayotekelezwa kwenye eneo hilo.

MONUSCO
Maigizo ya sanaa yanatumika kwenye jamii kuelimisha umma dhidi ya vitendo vya ukatili na unyanyasaji wa kingono vinavyoweza kufanywa na watendaji wa Umoja wa Mataifa.

Sanaa za maonyesho nazo pia zinashamiri kama ionekanavyo pichani ambapo ni mojawapo  ya mbinu ya kuhamasisha jamii kuhusu athari za ukatili na unyanyasaji wa kingono unaoweza kufanywa na watendaji wa Umoja wa Mataifa na mawakala wao. Hapa ni Sake mjini Masisi kwenye jimbo la Kivu Kaskazini. Maigizo haya ya sanaa yanapatia jamii pia stadi za kutoa taarifa kwa mitandao sahihi pindi wanapokumbwa na visa vya aina hiyo. Tangu mwaka 2013  jumla ya vikundi 43 vimeundwa kuhamasisha na vinajumuisha wanawake, vijana, viongozi wa mitaa na wale wa kidini.

MONUSCO/Michael Ali
MONUSCO inasaidia wadau wengine katika harakati za uhamasishaji wa wapiganaji wa zamani wa FDLR na wanafamilia wao kwenye kambi tatu huko Kayanbayonga, Walungu na Kisangani.

Katika maeneo ambako wapiganaji wa zamani wa kikundi cha waasi wa FDLR wamejisalimisha, MONUSCO na kikosi cha serikali wanasaidia wapiganaji hao wa zamani na familia zao katika kuimarisha ulinzi wao na kuwakwamua kimaisha. Wapiganaji hao wamewekewa kambi zao kwenye maeneo ya Kayanbayonga,Walungu na Kisangani. Pichani familia za wapiganaji zikisindikizwa kuhakikisha usalama wao.

MONUSCO
Sanaa za maigizo kwenye jamii hutumika kuelimisha jamii kuhusu hatari zitokanazo na ukatili na unyanyasaji wa kingono unaoweza kufanywa na watendaji wa Umoja wa Mataifa.

Mtoto wa kiume akishiriki kwenye igizo la sanaa la kuhamisisha na kuelimisha kuhusu ukatili na unyanyasaji wa kingono unaoweza kufanywa na watendaji wa  Umoja wa Mataifa huko Jamhuri  ya Kidemokrasia ya Congo, DRC. Hapo ni Sake jimboni Kivu Kaskazini na wanapatiwa stadi za kuhakikisha kuwa wana uwezo wa kuripoti tukio la aina hilo na wanafahamu ni wapi pa kuripoti ili hatua ziweze kuchukuliwa haraka iwezekanavyo.

MONUSCO/Michael Ali
Uzinduzi wa mradi wa kupunguza ghasia kwenye jamii, CVR kupitia kilimo huko Goma, jimboni Kivu Kaskazini, nchini Jamhuri ya Kidemokrasia ya Congo, DRC kwa kuwapatia vijana shughuli za kilimo..

Vijana wakazi wa eneo la Nyiragongo, huko Munigi jimboni Kivu  Kaskazini wakiwa kwenye shughuli za kilimo, ikiwa ni moja ya miradi ya kupunguza ghasia kwenye jamii inayoendeshwa na MONUSCO na kusimamiwa na shirika la kiraia la ASDI mjini humo. Kupitia miradi hii ya kilimo vijana wanajipatia kipato na hivyo kuondokana na fursa au ushawishi wa kutumikishwa kwenye vikundi vilivyojihami ambavyo vinaleta ghasia.

MONUSCO/Michael Ali
Uzinduzi wa mradi wa kupunguza ghasia kwenye jamii, CVR huko Goma jimboni Kivu Kaskazini nchini Jamhuri ya Kidemokrasia ya Congo, DRC.

Wakazi wa wa Munigi wakiwa katika tukio la uzinduzi wa kampeni ya kupunguza ghasia kwenye jamii katika jimbo lao hilo la Kivu Kaskazini ambako vikundi vilivyojihami vimekuwa chanzo cha ghasia huku wanawake na vijana wakishindwa kutekeleza shughuli zao za kujipatia kipato. Miradi hii ikiwemo kilimo, ushoni inaleta kuinua kipato na inatekelezwa na ujumbe wa Umoja wa Mataifa nchini DRC, MONUSCO.

MONUSCO/Michael Ali
Go back