Harakati za kusaka usalama huko Gaza

Watu huko Gaza wamelazimika kuyahama makazi yao mara nyingi na wanaishi katika makazi ya muda.

Wengi wa wananchi wa Gaza milioni 2.3 wanakimbia ghasia zinazozidi kaskazini na Kusini mwa Gaza kutokana na vita ambayo sasa ina miezi saba na ambayo imesababisha vifo vya wapalestina 36,000 na kuwaacha wengine katika njaa huku wengine wakiwa wamefukiwa kwenye vifusi katika maeneo yaliyo zingirwa.

Wananchi wengi wa Gaza wamelazimika kuyahama makazi yao mara kadhaa. Wengi wao walisafiri hadi Rafah, kusini mwa Gaza, ambako Israeli ilikuwa imetangaza kuwa ni eneo salama.

Mtoto mdogo akichungulia upande wa makazi ya hema uliopasuka katika Ukanda wa Gaza.

Kwa mujibu wa shirika la Umoja wa Mataifa la kuhudumia wakimbizi wa Palestina UNRWA hali katika makazi ya muda huko Rafah zilikuwa mbaya. Watu walikuwa wamejazana ndani ya safu za mahema na majengo ya kubahatisha, wanaume, wanawake na watoto waliokimbia makazi yao walikabiliwa na uhaba wa chakula, maji na mahitaji muhimu ya kila siku.

Watoto wawili wamesimama nyuma ya lori wakati familia yao ikikimbia Rafah kusini mwa Ukanda wa Gaza.

Hadi kufikia tarehe 20 Mei, zaidi ya asilimia 75 ya Ukanda wa Gaza - takriban kilomita za mraba 285 (maili za mraba 141) - ilikuwa chini ya maagizo ya kutakiwa kuhama huku kukiwa na ongezeko la uhasama, kulingana na taarufa iliyotolewa hivi karibuni na shirika la Umoja wa Mataifa la kuratibu wa Misaada ya Kibinadamu, OCHA.

Watoto wakila kiasi kidogo cha chakula kinachotolewa na Shirika la Umoja wa Mataifa la Mpango wa Chakula Duniani, WFP.

Kusini mwa Gaza, wadau wa Shirika la Umoja wa Mataifa la Mpango wa Chakula Duniani (WFP) wamepoteza uwezo wa kufikia zaidi ya vituo 100 vya usambazaji wa misaada kwa ajili ya shughuli za kuzuia utapiamlo huku mapigano yakiongezeka.

Gari la Umoja wa Mataifa likipita kwenye magofu ya Jiji la Gaza.

Mapigano katika mji wa Gaza, kaskazini mwa Gaza yamesababisha idadi kubwa ya raia kuyahama makazi yao na yanaendelea kuathiri pakubwa juhudi za kutoa msaada wa kuokoa maisha huku kukiwa na njaa, kwa mujibu wa mashirika ya Umoja wa Mataifa yaliyopo maeneo hayo.

Watoto wawili wanacheza nje ya makazi ya muda huko Gaza yaliyotengenezwa kwa kutumia vitambaa, ikiwa ni pamoja na vifaa vilivyotolewa kwa Umoja wa Mataifa.

Watu wamekuwa wakihamia maeneo ya katikati mwa Gaza ambayo pia yanashambuliwa na kukosa mahitaji muhimu kama vile chakula na maji. Hali hii huenda ikasababisha kuongezeka kwa magonjwa ya kuambukiza, ikiwa ni pamoja na hepatitis A, pamoja na utapiamlo, limesema shirika la OCHA.

Mvulana mwenye umri wa miaka 13 anapata nafuu katika Hospitali ya Nasser huko Khan Younis, Ukanda wa Gaza baada ya kukatwa mkono wake wa upande wa chini uliopondwa na kuwa na jeraha.

Wakimbizi wa kimatibabu kutoka kaskazini mwa Gaza ni pamoja na watoto wengi, mmoja wao ni Ibrahim mwenye umri wa miaka 13, ambaye aliumia sana kufuatia kuporomoka kwa makazi katika eneo lililotengwa na kuelezwa ni salama ambapo alikaa na familia yake. Ibrahim hatimaye alipoteza mkono wake wakati wa kukatwa mguu bila kutumia ganzi.

Sehemu kubwa ya Khan Younis imesalia magofu.

OCHA imesema watu waliokimbia makazi yao kutoka Rafah kwa sasa wanatafuta hifadhi katika maeneo ya Khan Younis na Deir Al-Balah katikati mwa Gaza kwenye ardhi yoyote ya wazi inayopatikana, ikiwa ni pamoja na barabara za kuingia katika eneo hilo, ardhi ya kilimo na katika majengo yaliyoharibiwa ambayo hayajatathminiwa kimuundo.