Msumbiji: Tabasamu kwenye nyuso za watoto na wazazi wakimbizi wa ndani, kulikoni?

Ulensa, mtoto mwenye umri wa mwaka 1, amekuwa na safari ya afya njema kutokana na jinsi mama yake Esha Saide anavyofuatilia kwa kina afya ya mtoto wake.

Mtoto wa Esha, Ulensa akiwa amefikiwa na huduma ya kiliniki inayotolewa na kikosi tembezi cha huduma jumuishi za afya. Huduma hizi pamoja na ile ya kupatiwa mlo bora zimemfanya Ulensa mwenye umri wa mwaka mmoja kuwa na afya bora kuliko nduguze wawili kwani wao hawakunufaika na huduma hizo ikiwemo ushauri wa lishe kwa mtoto.

Kikosi cha huduma jumuishi za afya kimetembelea wilaya ya Ancuabe iliyoko jimboni Cabo Delgado nchini Msumbiji. kutoa huduma za afya kwa wakimbizi wa ndani.

Ngamo Armando, amehakikisha mtoto wake Aive Afonso mwenye umri wa miezi 9 ananufaika na huduma za kijamii za afya jumuishi. Aliona mwanae anakohoa akaona bora amlete kwa vipimo na kisha akabainika ana utapiamlo. Sasa anapata nafuu baada ya kupatiwa uji wa karanga, wenyewe kijijini hapa wakiuita ‘chokoleti.’ Ngamo anashukuru uwepo wa huduma hii kwani hahitaji kwenda mwendo mrefu kupata huduma ya afya.

Kikosi hiki tembezi cha huduma jumuishi za afya kinapita nchini kote kikilenga kuokoa maisha na kuzuia magonjwa sugu kwa kuhakikisha huduma muhimu zinafikia maeneo ya ndani zaidi hasa jamii zilizo hatarini kama wakimbizi wa ndani wa Cabo Delgado.

Mama akimlisha mtoto wake mlo wenye virutubisho vya kuokoa maisha huko wilaya ya Mecufi, jimboni Cabo Delgado nchini Msumbiji.

Mtoto mwenye afya bora, akila uji wa karanga hapa Cabdo Delgado wakiuita 'chokoleti.' Uji huu una virutubisho na hivyo kuepusha watoto kupata utapiamlo. UNICEF na wadau wanatumia wahudumu wa afya wa kijamiii kufikia wananchi.

Kikosi cha huduma jumuishi za afya kimetembelea wilaya ya Mueda iliyoko jimboni Cabo Delgado nchini Msumbiji. ikisambaza vikasha vyenye vifaa vya dharura kwa wakimbizi wa ndani.

Wahudumu wa kiafya wa kijamii ndio wako mstari wa mbele kusaidia watoto na familia zilizofurushwa na machafuko yaliyoanza Cabo Delgado mwaka 2017. Hapa wanapatiwa mafunzo ya kuimarisha utoaji wa huduma za afya kwa mama na mtoto yanayotolewa na UNICEF kwa msaada wa ubalozi wa Ireland.

Kikosi tembezi cha huduma jumuishi za afya kimepatia akina mama misaada ya dharura ya kuokoa maisha ya watoto wao ikiwemo vyakula vyenye virutubisho huko wilaya ya Mueda jimboni Cabo Delgado nchini Msumbiji.

Baada ya mafunzo, akina mama wanapatiwa vifurushi hivi na ndoo vyenye vifaa sio tu vya kujisafi lakini pia vyakula vyenye lishe kwa ajili ya watoto hao waliokumbwa na utapiamlo kutokana na uhaba wa chakula kwenye eneo hili la Cabo Delgado lililokumbwa na machafuko tangu mwaka 2017.