Mashambulizi ya makombora yanaendelea katika Ukanda wa Gaza huku mzozo kati ya Israeli na wanamgambo wa kipalestina wa Hamas hauonyeshi dalili za kupungua. 

Vitongoji vyote  vya Gaza havikaliki  kufuatia mashambulizi ya makombora  kutoka angani.

Ofisi ya Umoja wa Mataifa ya misaada ya kibinadamu, OCHA, ikinukuu Wizara ya Afya huko Gaza, imethitibitisha kwamba idadi ya vifo katika eneo hilo lililozingirwa ilikuwa takriban 3,500,  ikijumuisha angalau vifo 850 vya watoto. 

Mamia ya maelfu ya watu walikimbilia kusini kutoka kaskazini mwa Gaza. OCHA inakadiria  kuna takriban watu milioni moja waliokimbia makazi yao wakiwemo zaidi ya 353,000  wanaojihifadhi katika shule za Shirika La Umoja wa Mataifa la Kuhudumia Wakimbizi wa Kipalestina, UNRWA.   

Mashirika ya Umoja wa Mataifa ya kibinadamu kama lile la Mpango wa Chakula WFP yamekuwa yakisambaza mikate na misaada mingine kwa wakimbizi, lakini chakula kinamalizika. 

Shehena za misaada zinamalizika na shirika la Umoja wa Mataifa la kusaidia wakimbizi wa kipalestina, UNRWA nalo kwa sasa limepatia hifadhi wakimbizi kwenye bohari yake ya vifaa huko Rafah, kusini mwa Gaza. 

Shehena za misaada zinamalizika na shirika la Umoja wa Mataifa la kusaidia wakimbizi wa kipalestina, UNRWA nalo kwa sasa limepatia hifadhi wakimbizi kwenye bohari yake ya vifaa huko Rafah, kusini mwa Gaza. 

Huduma ya msingi kama vile maji, afya na huduma za kujisafi zinapatikana  kwa shida na halikadhalika umeme. 

Kuzingirwa kabisa kwa Gaza kunaendelea na hakuna mtu anayeruhusiwa kuondoka kupitia kivuko cha Rafah na kuingia eneo la Sinai nchini Misri. 

Siku ya Ijumaa, Katibu Mkuu wa Umoja wa Mataifa aliwaambia waandishi wa habari kwamba kuwezesha misaada kuingia Gaza kupitia kivuko cha Rafah ni sawa na “tofauti kati ya uhai na kifo.”