مصر سے غزہ کی جانب رفح کا سرحدی راستہ زیر محاصرہ علاقے میں بمباری سے متاثرہ اور بے گھر لوگوں کو انسانی امداد پہنچانے کی بین الاقوامی کوششوں کا مرکز بن گیا ہے۔

غزہ کی پٹی پر میزائل حملے جاری ہیں جبکہ اسرائیل اور حماس کے مابین لڑائی ختم ہوتی دکھائی نہیں دیتی۔

غزہ پر میزائل اور توپ خانے کے حملوں کے بعد تمام علاقے ناقابل رہائش ہو چکے ہیں۔

اقوام متحدہ کے امدادی دفتر ’اوچا‘ نے غزہ کی وزارت صحت کے حوالے سے بتایا ہے کہ علاقے میں اب تک کم از کم 850 بچوں سمیت 3,500 لوگ ہلاک ہو چکے ہیں۔

لاکھوں لوگ شمالی غزہ سے جنوب کی جانب جا چکے ہیں۔ 'اوچا' کا اندازہ ہے کہ علاقے میں تقریباً 10 لاکھ لوگ بے گھر ہیں جن میں سے 353,000 سے زیادہ افراد نے 'انرا' کے سکولوں میں پناہ لے رکھی ہے۔

عالمی پروگرام برائے خوراک جیسے اقوام متحدہ کے ادارے بے گھر لوگوں میں روٹی اور دیگر امداد تقسیم کر رہے ہیں لیکن علاقے میں خوراک ختم ہونے کو ہے۔

ضرورت کی اشیا ختم ہو رہی ہیں اور فلسطینی پناہ گزینوں کے لیے اقوام متحدہ کا ادارہ 'انرا' اب جنوب میں رفح کی سرحد کے قریب اپنے انتظامی مرکز میں بے گھر لوگوں کو پناہ دے رہا ہے۔

پانی، صحت اور نکاسی آب جیسی ضروری خدمات نہ ہونے کے برابر ہیں اور بجلی کی بہت کم مقدار دستیاب ہے۔

غزہ کا مکمل محاصرہ جاری ہے اور کسی کو رفح سے مصر کے علاقے سینائی میں داخلے کی اجازت نہیں۔

جمعے کو اقوام متحدہ کے سیکرٹری جنرل نے میڈیا کو بتایا کہ رفح کے سرحدی راستے سے غزہ میں امداد کی ترسیل پر ہی زیر محاصرہ لوگوں کی زندگی کا دارومدار ہے۔