Tarehe 31 Agosti ni siku ya mwisho ya uraisi wa duru wa Baraza la Usalama kwa Uingereza. Kuanzia tarehe mosi Septemba uraisi wa Baraza la Usalama utakabidhiwa Marekani. Ijumatano Balozi Susan Rice wa Marekani anatarajiwa kutangaza mradi wa kazi na ajenda ya Baraza la Usalama kwa mwezi Septemba.
Mkutano Mkuu wa Dunia juu ya Hali ya Hewa (WCC-3) umefunguliwa rasmi Geneva Ijumatatu ya leo, ambapo wataalamu na wanasiasa kutoka sehemu mbalimbali za ulimwengu, wanakutana kwa mashauriano ya kuhakikisha umma wa kimataifa huwa unapatiwa uwezo wa kutabiri hali ya hewa pamoja na taarifa nyengine kama hizo, ili kukabiliana vyema na taathira za mabadiliko ya hali ya hewa.
Shirika la Vikosi vya Mchanganyiko vya UM-UA kwa Darfur (UNAMID) limepokea maofisa wa polisi 26 kutoka Nepal na polisi 30 wa Nigeria waliowasili kwenye mji wa El Fasher leo Ijumatatu.
Ann Veneman, Mkurugenzi Mkuu wa Shirika la UM juu ya Mfuko wa Maendeleo kwa Watoto (UNICEF) kwenye siku ya mwisho ya ziara ya siku tano alioendeleza katika JKK alipata fursa ya kukutana na wale watoto waliotoroshwa na waasi wa Uganda wa kundi la LRA.
Baada ya kukamilisha ziara yake katika Zambia, Mtaalamu Huru wa UM anayetetea haki za binadamu na umaskini uliovuka mipaka, Magdalena Sepúlveda, kwenye mahojiano na waandishi habari mjini Lusaka alionya kwamba "ufukara mkubwa uliopamba nchini Zambia haotofanikiwa kukomeshwa kwa ufasaha wa usemaji bali kwa vitendo halisi."
KM Ban Ki-moon wiki ijayo atafanya ziara ya siku mbili katika Svalbard, Norway, ili kujionea binafsi athari za mabadiliko ya hali ya hewa katika eneo la Kaskazini ya dunia la Akitiki (Arctic). Kwanza KM atakwenda eneo la Ny-Alesund, liliopo Kaskazini kwenye fungu la visiwa vya Svalbard, ambapo atazuru steshini ya uchunguzi juu ya mazingira ya ncha ya dunia, kabla hajaelekea Kaskazini juu zaidi ambapo atapatiwa taarifa mpya za kisayansi kuhusu namna majabali ya barafu yanavyodhibiti na kurekibisha shughuli za Bahari ya Akitiki na kuathiri mabadiliko ya hali ya hewa ya ulimwengu.
Shirika la Afya Duniani (WHO) kwenye taarifa ya wiki kuhusu hali ya maambukizo ya homa ya mafua ya A/H1N1 llimeeleza ya kwamba katika nchi za kizio cha kusini ya dunia, ikijumlisha Chile, Argentina, New Zealand na Australia maambukizo ya maradhi yameshapita kilele na hivi sasa yameselelea kwenye kigezo wastani, wakati mataifa ya Afrika Kusini na Bolivia yanaendelea kukabiliwa na ongezeko la homa ya mafua.
Shirika la Kimataifa juu ya Wahamaji (IOM) limetangaza kufunguliwa Kituo cha Wahamaji wa Ajira katika Afrika Kusini, kwenye mji wa mipakani wa Beitbridge.
UM umetoa mwito maalumu wenye kuwataka mamilioni ya umma wa kimataifa kutia sahihi zao, kwenye mtandao, ili kuidhinisha lile ombi la kuzihimiza serikali wanachama Kukamilisha Makubaliano juu ya waraka wa Mkutano wa COP-15, yaani ule Mkutano Mkuu utakaofanyika mwezi Disemba katika mji wa Copenhagen, Denmark kuzingatia mkataba mpya wa udhibiti bora wa mabadiliko ya hali ya hewa ulimwenguni.
Shirika la UM juu ya Huduma za Wahamiaji (UNHCR) limeripoti kutoka Geneva, kwamba kundi la waasi wa Uganda, wanaojiita Jeshi la Upinzani la MUngu (Lord Resistance Army/LRA) bado wanaendeleza, kwa kiwango kikubwa vitendo vya ufisadi, uharibifu na kusababisha uhamisho uliovuka mipaka wa watu katika eneo la mashariki la JKK.
