Kanayo F. Nwanze, Raisi wa Taasisi ya Mfuko wa Kimataifa kwa Maendeleo ya Kilimo (IFAD) ametoa taarifa yenye kuonya kwamba "umasikini na njaa ni maafa ya kikatili na yasiovumilika katu" kimataifa na ni lazima yakomeshwe.
Kamisheni ya UM juu ya Maendeleo ya Uchumi kwa Afrika (ECA) imewasilisha ripoti mpya Geneva inayotathminia hali ya uchumi, kwa ujumla, barani Afrika kwa 2009. Mada ya ripoti inasema: "Tuendeleze Kilimo Afrika kwa Fungamano za Maadili ya Kikanda".
KM Ban Ki-moon ametangaza taarifa yenye kulaumu vikali shambulio la bomu liliofanyika katika mji wa Lahore, Pakistan, ambapo watu 30 ziada waliripotiwa kuuawa na 250 wengine walijeruhiwa. Alisema hakuna kitendo chochote kinachohalalisha kosa hili la vurugu inayochochewa na ugaidi. KM aliwatumia mkono wa taazia aila za waathirika wa tukio hilo, na kuwaombea majeruhi wapone haraka, na kukukumbusha ushikamano uliopo baina yake na Serikali, pamoja na umma wa Pakistan, kwenye zile juhudi za kuwafikisha waliondeleza makosa haya mahakamani kukabili haki.
Idara ya UM juu ya Masuala ya Kiuchumi na Jamii (DESA) asubuhi iliwasilisha rasmi, ripoti ya katikati ya mwaka, yenye mada isemayo “Hali ya Uchumi Duniani na Matumaini kwa 2009”. Ripoti ilibashiria uchumi wa ulimwengu kwa mwaka huu utateremka kwa asilimia 2.6, baada ya huduma za kiuchumi kupanuka kwa asilimia 2.1 katika 2008, na baada ya kupanuka, vile vile, kwa karibu asilimia 4 kila mwaka katika kipindi cha baina ya 2004 na 2007.
Ijumanne asubuhi, kwenye kikao cha wawakilishi wote wa Baraza Kuu (BK) la UM, kulichukuliwa uamuzi wa pamoja wa kuakhirisha Mkutano Mkuu juu ya Migogoro ya Uchumi na Fedha Duniani na Athari Zake Dhidi ya Maendeleo, kikao ambacho kilitarajiwa kifanyike baina ya Juni 1 hadi 03.
Ripoti ya 2008 Kamati ya Kimataifa ya Msalaba Mwekundu na Hilali Nyekundu (ICRC) iliowakilishwa mjini Geneva wiki hii na mkuu wa taasisi hiyo, Jakob Kellenberger, ilibainisha kwamba mamilioni ya watu walioathirika na hali ya mapigano duniani, waliendelea kumedhurika zaidi kimaisha kwa sababu ya mchanganyiko wa athari za vita, maafa ya kimaumbile na kupanda kwa bei za chakula kwenye soko la kimataifa.
Shirika la UM juu ya Ulinzi Amani katika JKK (MONUC) limeripoti, mnamo Ijumaa iliopita, vikosi vya UM vililazimika kupelekwa kwenye sehemu za nchi zilizoshuhudia fujo na vurugu liliochochewa na makundi haramu ya waasi.
Alan Doss, Mjumbe Maalumu wa KM kwa JKK, Ijumatatu aliwaambia wajumbe waliowakilisha jumuiya za kiraia, waliohudhuria mkutano uliofanyika mjini Kinshasa kusailia masuala ya usalama na amani nchini, kwamba wakati umewadia kwa wananchi kutekeleza mageuzi ya kizalendo kwenye zile juhudi za kupiga vita umaskini na ulaji rushwa katika taifa lao.
Shirika la Chakula na Kilimo (FAO) pamoja na Taasisi ya Mfuko wa Kimataifa kwa Maendeleo ya Kilimo (IFAD) yamehadharisha ya kuwa mtindo wa wageni kumiliki ardhi za kizalendo - hususan katika bara la Afrika - ni tatizo linaloashiria wazalendo maskini huenda wakafukuzwa kutoka maeneo haya au kunyimwa uwezo wa kumiliki mali hiyo kuendesha maisha. Mashirika ya FAO na IFAD yameyahimiza Mataifa Wanachama kuhakikisha sheria za kumiliki ardhi kwa jamii zinazoishi kwenye vijiji zinahishimiwa, na kuwahusisha wenyeji hawa kwenye makubaliano yote yanayohusu biasahara ya kuwauzia wageni ardhi katika siku za baadaye .
