Taarifa iliotolewa bia leo hii na mashirika mawili ya UM yanayohudumia maendeleo ya watoto, yaani UNICEF, na afya duniani, yaani WHO, imepongeza msaada wa dola milioni 9.7 waliopokea kutoka Waqf wa Bill na Melinda Gates, kwa makusudio ya kuimarisha utafiti wa kutengeneza dawa zitakazotumiwa makhsusi, na kwa urahisi, na watoto wadogo chini ya umri wa miaka kumi na tano.
Wajumbe wa kimataifa kutoka nchi 60 ziada wanakutana mjini Roma, Utaliana kwenye Makao Makuu ya Shirika la UM juu ya Chakula na Kilimo (FAO) kuanzia leo tarehe 21 mpaka 23 Januari (2009) ambapo wataendelea kujadiliana mpango wa utendaji, unaohitajika kudhibiti bora matumizi ya maji ulimwenguni, kufuatia athari mbaya za mazingira zinazochochewa na mabadiliko ya hali ya hewa duniani.
Shirika la Ulinzi Amani la UM katika JKK (MONUC) limetangaza rasmi kwamba wanajeshi karibu 2,000 wa Rwanda Ijumanne waliruhusiwa kuingia katika JKK, kwa kupitia eneo la mashariki, kuwasaka waasi wa Rwanda, wa kundi la FDLR, wenye asili ya kiHutu ambao inaripotiwa ndio miongoni mwa makundi yenye kupalilia hali ya wasiwasi kieneo kwa muda wa zaidi ya miaka kumi.
Baraza la Usalama leo asubui linazingatia Operesheni za Kulinda Amani za UM katika Cote d’Ivoire pamoja na Ripoti ya KM juu ya suala hilo.
Ijumanne KM ameripotiwa kutuma risala maalumu ya pongezi kwa kutawazwa kwa Barack Obama kuwa Raisi wa 44 wa Marekani. Risala hiyo ilisema KM ana “matarajio makubwa” kuhusu Uraisi wa Barack Obama kwenye zile juhudi za kutafuta suluhu ya mizozo kadha wa kadha ya ulimwengu iliokabili jumuiya ya mataifa: kama wasiwasi wa kiuchumi; athari za mabadiliko ya hali ya hewa; masuala magumu yanayohusu usalama na amani, ikijumlisha ukomeshaji wa uenezaji wa silaha za kinyuklia na upunguzaji wa silaha; pamoja na mchanganyiko wa matatizo yanayohusu mifumko ya bei za chakula na nishati na vile vile kupwelewa kwa huduma za maendeleo. KM alisema Raisi Obama ameahidi serikali yake ipo tayari kukabiliana na masuala haya bila shaka yoyote!~
KM wa UM Ban Ki-moon, alikutana leo kwenye mji wa Jerusalem, na Waziri Mkuu wa Israel Ehud Olmert na kumwelezea faraja aliyopata baada ya kutangazwa ilani ya upande mmoja ya kusitisha mapigano.
Dktr Guido Sabatinelli, Mkurugenzi wa Afya wa Shirika la UM Linalofarajia Misaada ya Kiutu kwa Wahamiaji wa KiFalastina wa Mashariki ya Karibu (UNRWA), kwenye mazungumzo na waandishi habari mjini Geneva alielezea juu ya hali dhaifu iliokabili sekta ya afya, ambayo imeharibika zaidi kutokana na mashambulio ya wiki tatu zilizopita.
Shirika la Kimataifa juu ya Wahamaji (IOM) limechapisha ripoti yenye kuonyesha wahamaji wa ndani ya nchi (IDPs), katika Sudan Kusini na Korodofan ya Kusini sasa hivi hukabiliwa na matatizo makubwa ya maji, pale wanaporejea makwao kutoka kambi za makazi ya muda.
Shirika la IOM limeeleza kwamba katika kipindi cha kuanzia tarehe 20 Disemba 2008 hadi 10 Januari 2009 lilifanikiwa kuwafikia watu 160,000 na kuwapatia tembe za kusafisha maji na nasaha kinga dhidi ya maradhi ya kipindupindu katika maeneo ya Zimbabwe ya Harare, Bulawayo na Mutare.
Mjumbe Maalumu wa KM kwa Eneo la MAziwa Makuu, Olusegun Obasanjo, Ijumanne alikutana na Raisi Joseph Kabila mjini Kinshasa katika JKK. Raisi Kabila alimweleza Mjumbe wa KM juu ya operesheni zinazoendelezwa shirika, sasa hivi, ndani ya nchi na majeshi ya JKK na Rwanda, dhidi ya kundi la waasi la FDLR. Operesheni hii zinatarajiwa kuendelea kwa wiki kadhaa zijazo. Vile vile mazungumzo ya kisiasa ya kudumisha suluhu ya amani kwenye Eneo la Maziwa Makuu, hususan katika sehemu ya mashariki katika JKK, bado yanaendelea chini ya usimamizi shirika wa Mjumbe Maalumu wa KM, Obasanjo na Raisi Mstaafu wa Tanzania Bejamin Mkapa. ~
