Habari Mpya

Kwenye tafrija maalumu iliyofanyika katika mji wa Davos, Uswiss Alkhamisi KM wa UM aliadhimisha miaka kumi ya tangu kupitishwa yale Mapatano ya UM juu ya Maadili Mema ya Kibiashara kwa Makampuni ya Kimataifa au UN Global Compact. KM alisema kwenye risala yake kwamba mapatano ya UN Global Compact yanajumuisha mradi mkubwa, unaosarifika, na wa kutia moyo wenye kuonogoza shughuli za kibiashara zinazohishimu haki za binadamu, ajira halali, mazingira bora na kupiga vita karaha ya ulaji rushwa. Makampuni ya kibiashara 6,000 kutoka mataifa 130 ziada ni washiriki wa Mapatano ya UN Global Compact.

Shirika la UM juu ya Haki za Wafanyakazi (ILO) leo mjini Geneva limewasilisha ripoti ya mwaka yenye kuashiria muongezeko mkubwa wa idadi ya watu wasiokuwa na kazi katika 2009, kwa sababu ya kuselelea, kwa nguvu, kwa mizozo ya kiuchumi ulimwenguni.

Christopher Gunness, Msemaji wa Shirika la UM Linalofarajia Misaada ya Kiutu kwa WaFalastina wa Mashariki ya Karibu (UNRWA) ametoa taarifa maalumu yenye kukana zile tetesi zilizoenezwa kwenye vyombo vya habari, zenye kudai ya kwamba misaada ya UM, inayopelekwa kwenye eneo liliokaliwa la WaFalastina la Tarafa ya Ghaza huibiwa au hutekwa nyara [na makundi fulani ya kisiasa].

Kadhalika UNRWA hii leo imeripoti WaFalastina 900,000 katika Tarafa ya Ghaza, sasa wanahudumiwa chakula na UM kufuatia mashambulio haribifu ya karibuni ya Israel katika eneo hilo.

Shirika la Afya Duniani (WHO) limeripoti takwimu mpya kuhusu idadi ya vifo vya kipindupindu katika Zimbabwe, na kueleza sasa hivi idadi hiyo imekiuka vifo 3,000, na imefikia vifo 3,028, kati ya wagonjwa 57,702 walioambukizwa na maradhi hayo tangu mwezi Agosti 2008. ~

Shirika la Ulinzi Amani la UM katika JKK (MONUC) limetoa taarifa yenye kueleza kwamba litatuma msaada wa usafiri na huduma za tiba kwa vikosi vya Rwanda na JKK ambavyo vinashirikiana kupambana na waasi wa KiHutu katika eneo la mashariki ya nchi, na ilisisitiza kwamba vikosi vya MONUC havitoshiriki kabisa kwenye operesheni hizo.

Wajumbe wa Baraza la Usalama wamekutana Ijumatano, kwenye kikao cha faragha, kushauriana juu ya masuala yanayohusu hali katika Jamhuri ya Kidemokrasi ya Kongo (JKK), Sudan na pia masuala mengine juu ya amani ya kimataifa. ~

Alan Doss, Mjumbe Maalumu wa KM kwa JKK, ameripoti kuridhia rasmi ombi la serikali ya Kongo la kutaka isaidiwe katika kuandaa mipango ya zile operesheni za pamoja za vikosi vya JKK/Rwanda dhidi ya waasi wa KiHutu kutoka Rwanda, waliopo kwenye eneo la mashariki. Uamuzi huu ulitolewa Ijumanne baada ya Doss kuzuru sehemu ya mashariki ya nchi, ambapo alipata fursa ya kutathminia athari za operesheni za vita kwa raia. Shuirika la Ulinzi Amani la UM katika JKK (MONUC) linatarajiwa kupeleka Goma, yalipo makao ya operesheni za vikosi vya JKK/Rwanda, timu ya maofisa wa kijeshi watakaowasiliana na kusaidia kupanga udhibiti bora wa operesheni zao, kwa makusudio ya kuwajumlisha watumishi wa kiraia watakaosimamia kadhia za kiutu kwa umma muhitaji kwenye eneo la uhasama.

Kamishna Mkuu wa UM juu ya Haki za Binadamu, Navi Pillay, ameeleza kuwa ana wahka mkubwa juu ya ripoti alizopokea za kukithiri kwa vitendo vinavyokiuka na kutengua haki za binadamu, vinavyoendelezwa na wafuasi wa kundi la waasi wa Uganda wa LRA, katika kaskazini ya JKK.

Alan Doss, Mjumbe Maalumu wa KM kwa Jamhuri ya Kidemokrasi ya Kongo (JKK) ameripotiwa akisema kwamba rai ya kuruhusu Wanyarwanda waliokuwa wakipigana na majeshi ya mgambo nchini Kongo kuzuru makwao na kuchunguza kama hali inafaa kwao kurejea, ni moja ya taratibu ambazo zikitekelezwa kama inavyopasa, zitasaidia kupunguza vurugu na uhasama unaofufuka mara kwa mara kwenye eneo la uhasama Kongo. Mradi huo, alisisitiza Doss, unabashiria “mapatano mema kati ya Serikali za Rwanda na JKK, yalioamua hatua za kuchukuliwa, zilizo salama,” za kuwarejesha makwao wale wapiganaji waliotokea Rwanda ikiwa wapiganaji hawo wataridhia kurejea kwa hiyari.