Takwimu za bei ya vyakula zilizotolewa hii leo mjini Roma Italia na shirika la chakula na kilimo la Umoja wa Mataifa, FAO, zinaonesha bei ya chakula ulimwenguni ilipanda kwa miezi saba mfululizo hadi mwezi Desemba mwaka jana, ikiongozwa na bidhaa za maziwa na mafuta ya mbogamboga. Assumpta Massoi na maelezo zaidi.
Nchini Ethiopia ambako asilimia 40 ya wasichana wanaolewa kabla ya kufikia umri wa miaka 18, msichana Tsigist Wudu Chekol ilikuwa kidogo tu awe miongoni mwa hao lakini akaponea chupuchupu na sasa ni mwanachama wa kikundi cha wasichana katika shule anayosoma, kinachopambana kuhakikisha katika jamii hakuna mtoto anayeolewa kabla ya wakati. Ahimidiwe Olotu na maelezo zaidi.
Katibu Mkuu wa Umoja wa Mataifa Antonio Guterres amerejea wito wake wa kusitisha uhasama kimataifa na kuyataka makundi yote yenye silaha kuweka silaha hizo chini na kujiunga katika mchakato wa amani, baada ya raia zaidi ya 20 kuuawa nchini Jamhuri ya Kidemokrasia ya Congo DRC. Jason Nyakundi na maelezo zaidi.
Akisistiza umuhimu wa serikali ya DRC kuchukua hatua madhubuti kushughulikia vyanzo vya mizozo Mashariki mwa nchi hiyo Katibu Mkuu amesema raia wasio na hatia hupoteza maisha kila uchao vita vinapoendelea.
Wahenga walinena ukishikwa shikamana, na ndivyo anavyofanya Liberee Kayumba ambaye ni manusura wa mauaji ya kimbari ya Rwanda dhidi ya Watutsi yaliyofanyika mwaka 1994, anasema yuko hai leo hii sababu ya msaada wa chakula wa shirika la Umoja wa Mataifa la mpango wa chakula WFP , ambao ulimuhamasisha baadaye kujiunga na shirika hilo kusaidia wakimbizi wa Burundi kama alivyosaidiwa. John Kibego anasimulia zaidi
(TAARIFA YA JOHN KIBEGO)
Umoja wa Mataifa kupitia mpango wake wa kuweka utulivu nchini Jamhuri ya Afrika ya Kati, MINUSCA umewaaga kwa heshima walinda amani kutoka Burundi, Bangladesh, na Cameroon ambao walipoteza maisha yao hivi karibuni wakiwa kazini. Taarifa ya Ahimidiwe Olotu inaeleza zaidi.
(Taarifa ya Ahimidiwe Olotu)
Katibu Mkuu wa Umoja wa Mataifa Antonio Guterres amesema kushughulikia mazingira hatarishi na mzozo ni nguzo muhimu kwa ajili ya amani na usalama huku akisema mambo hayo pia ni kizuizi kikubwa katika kutekeleza ajenda ya mwaka 2030 ya maendeleo endelevu. Grace Kaneiya na taarifa zaidi
(TAARIFA YA GRACE KANEIYA)
Ashford Kariuki ni kati ya vijana ambao wamenufaika na mkopo kutoka kwa hazina ya maendeleo ya vijana nchini Kenya ambayo ilibuniwa kwa lengo la kuwainua vijana walio na ndoto za kujiajiri na kujiendeleza kimaisha. Baada ya masomo ya shule ya upili alianzisha biashara ya kuwauzia wakulima chakula cha mifugo. Mwaka uliopita alifanikiwa kupata mkopo wa lori kutoka hazina hiyo ya vijana ikiwa ni hatua kubwa katika biashara yake. Amezungumza na mwandishi wetu wa nchini Kenya, Jason Nyakundi.
Nchini Zimbabwe kijana mdogo wa umri wa miaka 17 anatumia kipaji chake cha kuongea kuhamasisha mapambano dhidi ya mabadiliko ya tabianchi.
Huyo ni Nkosilathi Nyathi mwenye umri wa miaka 17, mkazi wa Victoria Falls, Zimbabwe. Akitumia kipaji chake cha kuzungumza na kughani katika kueneza elimu ya kupambana na mabadiliko ya tabianchi.
Kutana na muhamiaji Mohamed Ahmed Bushara aliyekwenda kusaka maisha Libya miaka mitano iliyopita lakini hali ngumu, ubaguzi , machafuko na kuwekwa rumande vilimkatisha tamaa ya kukimbiza ndoto hiyo na akakata shauri kurejea nyumbani Sudan kushika ustaaranu mwingine kwa msaada wa shirika la Umoja wa Mataifa la uhamiaji IOM na Muungano wa Ulaya.
Shirika la Umoja wa Mataifa la kuhudumia wakimbizi, UNHCR linaendelea kuandikisha wakimbizi wapya katika mpaka wa Sudan na Ethiopia ambapo takriban wakimbizi 800 wamevuka kutoka eneo la Tigray nchini Ethiopia na kuingia mashariki mwa Sudan katika siku chache za mwaka huu wa 2021.
