Kamati ya Umoja wa Mataifa ya Haki za Watu Wenye Ulemavu hii leo imeeleza kuwa watu wenye ulemavu walioko Gaza wapo kwenye hali ngumu na watakuwa wa kwanza kuuawa kutokana na fursa chache za kuwawezesha kukimbia maeneo ambayo Israel inatangaza wanatakiwa kuondoka kabla haijafanya mashamulizi.
Mratibu Maalum wa Umoja wa Mataifa kwa ajili ya mchakato wa amani ya Mashariki ya Kati Tor Wennesland amelaani vikali shambulizi la anga la jeshi la Israel jana usiku ambalo limepiga kambi ya wakimbizi wa ndani katika mji wa Rafah Kusini mwa Gaza.
Mkutano wa nne wa Kimataifa wa Nchi za Visiwa Vidogo Zinazoendelea (SIDS4) umeanza leo katika mji mkuu wa Antigua na Barbuda, St. John ili kutoa mpango wa utekelezaji wa kijasiri na wa mageuzi ili kusaidia SIDS kujenga mnepo, kukabiliana na changamoto kubwa zaidi duniani na kufikia Malengo ya Maendeleo Endelevu.
2023 ulikuwa mwaka wa changamoto nyingi, halikadhalika mafanikio mengi, amesema Dkt. Tedros Ghebreyesus, Mkurugenzi Mkuu wa shirika la Umoja wa Mataifa la afya ulimwenguni, WHO wakati akiwasilisha ripoti yam waka jana ya shirika hilo mbele ya wajumbe wa mkutano wa 77 wa Baraza la shirika hilo huko Geneva, Uswisi. Miongoni mwa mafanikio hayo ni kupungua kwa matumizi ya tumbaku katika nchi 150, na kwamba kwa sasa kuna watumia tumbaku wachache milioni 19 ikilinganishwa na miaka miwili iliyopita.
Makumi ya watu wanaaminika kufariki dunia katika shambulio la Israel la usiku wa kuamkia leo kwenye kambi ya wakimbizi wa ndani huko Rafah kusini mwa Gaza, likiwa ni tukio la hivi karibuni la kutisha katika zaidi ya miezi saba ya vita kati ya jeshi la Israeli na wapiganaji wa Palestina, wamesema leo wahudumu wa kibinadamu wa Umoja wa Mataifa .
Katibu Mkuu wa Umoja wa Mataifa António Guterres yuko nchini Antigua na Barbuda ambako leo amehutubia jukwaa la biashara akisema kuwa ahadi endelevu inahitajika kutoka jamii ya kimataifa ili kupata fedha zinazohitajiwa na nchi zinazoendelea za visiwa vidogo, SIDS, kwa sababu fedha za umma hazitatosha.
Yaweza kuwa ni ukuta uliojengwa kwa maboksi yaliyorejelezwa, lakini pindi viongozi wa dunia watakapokutana kuanzia kesho Jumatatu kwa ajili ya mkutano wa Nne wa Kimataifa wa nchi za visiwa vidogo zinazoendelea, SIDS4, moja ya makaribisho watakayolakiwa nayo ni ukuta wa ahadi kutoka kwa vijana ukielezea matumaini yao kwa dunia bora kwa kila mtu ili viongozi hao wachukue hatua kukabili madhara ya tabianchi.
Maporomoko ya udongo huko kaskazini mwa Papua New Guinea yasadikiwa kuwa yanaweza kuwa yamesababisha maafa makubwa zaidi ya ilivyodhaniwa awali, amesema hii leo Serhan Aktoprak, Mkuu wa shirika la Umoja wa Mataifa la Uhamiaji, IOM. Awali iliripotiwa kuwa maporomoko hayo yaliyokumba nchi hiyo Ijumaa yalifukia watu 670.
Huko Ukraine hii leo imeripotiwa ya kwamba shambulio lililofanywa na jeshi la Urusi kwenye eneo la manunuzi lenye watu wengi mjini Kharkiv limesababisha vifo vya takribani watu wanne. Denise Brown, Mratibu wa Kibinadamu wa Umoja wa Mataifa nchini Ukraine amelaani vikali shambulio hilo na kutaka raia walindwe.
Leo ni siku ya kimataifa ya mpira wa miguu ujulikanao pia kama soka au pia “kabumbu” siku iliyopitishwa na Baraza Kuu la Umoja wa Mataifa tarehe 7 mwezi huu wa Mei kwa kutambua mchango wa mchezo huo katika kusongesha amani dunia na pia katika kufanikisha malengo ya Umoja wa Matiafa ya maendeleo endelevu, SDGs.
