Leo ni siku ya kimataifa ya afya ya mimea: FAO
Leo ni siku ya kimataifa ya afya ya mimea
Leo ni siku ya kimataifa ya afya ya mimea: FAO
Malengo ya Maendeleo Endelevu
Ikiwa leo ni Siku ya Kimataifa ya Afya ya Mimea mwaka huu ikibeba mauhui “Afya ya mimea, biashara sama na teknolojia ya kidijitali” Shirika la Umoja wa Mataifa la chakula na kilimo FAO linasisitiza Dunia inapaswa kuhakikisha mimea ambayo ni uhai inalindwa na kuthaminiwa.
Mimea ni Uhai
Kwa mujibu wa FAO Dunia inategemea mimea kwa asilimia 80 ya chakula tunachokula na asilimia 98 ya hewa ya oksijeni tunayopumua.
Lakini limesema safari za kimataifa na biashara zimehusishwa na kuanzishwa na kuenea kwa wadudu waharibifu wa mimea.
Viumbe wadudu vamizi ni mojawapo ya vichochezi vikuu vya upotevu wa bayoanuwai na kutishia mtandao dhaifu wa maisha unaodumisha sayari yetu. Shirika hilo limeongeza kuwa wadudu na magonjwa pia yamehusishwa na kupanda kwa halijoto ambayo hutengeneza maeneo mapya kwa ajili ya wadudu kujaa na kuenea.
Kutokana na hali hiyo, FAO inasema matumizi ya dawa za kuulia wadudu yanaweza kuongezeka, ambayo yanadhuru wadudu waharibifu, maadui wa wadudu wa asili na viumbe muhimu kwa mazingira yenye afya.
Ili kulinda afya ya mimea shirika hilo limesisitiza kuwa “ni muhimu kuendeleza mazoea rafiki kwa mazingira kama vile udhibiti jumuishi wa wadudu. Viwango vya kimataifa vya hatua za usafi wa mazingira (ISPMs) katika biashara pia husaidia kuzuia, kuanzishwa na kuenea kwa wadudu waharibifu wa mimea kwenye mipaka.”
Jamii Kusini mwa Madagascar wakipanda katani kulinda ardhi dhidi ya mmomonyoko wa udongo
Maudhui ya mwaka huu
Kila mwaka, zaidi ya makontena milioni 240 husafirishwa kati ya nchi na nchi, yakiwa na bidhaa za mimea, na kusababisha hatari za usalama wa viumbe hai. Zaidi ya hayo, takriban asilimia 80 ya shehena za biashara ya kimataifa ni pamoja na vifaa vya kufungashia mbao, vinavyotoa njia ya maambukizi ya wadudu.
Kwa hivyo, uharibifu kutoka kwa aina za wadudu waharibifu husababisha hasara ya kiuchumi ya kimataifa ya takriban dola bilioni 220 kila mwaka. Kulinda afya ya mimea kwenye mipaka ni muhimu kwa kukuza ushirikiano wa kimataifa na viwango vya kimataifa, kama vile viwango vya kimataifa vya vipimo vya usafi wa miti (ISPMs). Suluhu bunifu kama vile uthibitishaji wa kielektroniki wa phytosanitary (ePhyto) hurahisisha mchakato, na kufanya biashara kuwa ya haraka na salama zaidi.
Siku ya Kimataifa ya Afya ya Mimea 2024 inatoa wito kwa kila mtu kuongeza ufahamu na kuchukua hatua ili kuweka mimea yetu kuwa na afya na kuhakikisha usalama wa chakula na biashara salama kwa uchumi endelevu na maisha.
Siku ya Kimataifa ya Afya ya Mimea huadhimishwa kila mwaka 12 Mei.